GARA SCIALPINISTICA Monte Peller del 09/01/2011
El meteo il lo mette propri bruttin per ancoi, ma no se pol zerto passar el weekend serai su: gh'è da nar! Ma ndove? E allor, sento el Max, che quando gh'è gare, l'è nà garanzia: ancoi gh'è la gara sul Peller.... anca se gh'è nebbie basse, el percorso l'è segnalà, e nsomma na bella tirada de còl nol ne la cava nessuni. El Teo, non podendo vegnir el me zede la sò iscriziom e partidi da Roveredo alle 6 e trovai col Roberto (la promessa agonistica dell'Arcobaleno Team) a Trent, ne trém su sora Tassullo al parcheggio de inizio gara. Arrivém lì che l'è ancor engual not: i è ancor drio a montar i gazebi... paghém l'iscriziom e spetem 'na mezora entant che l Max l se fa spiegar i trucchi de gara dal'Oprandi. I primi 100metri del percorso, essendo giàz vif, i le evita spostando envanti la linea de partenza: ma i se raccomanda de star all'ocio a narghe al vers... addirittura attrezzà la forestale con corde fisse! Alle 8 e 1/4, bevém na chichera de the calt, ne meteém en linea e per la meza...gh'è da nar! Mi no punto zerto a far prestaziom: me basta demò far i me mili metri de dislivel anca ancoi, e quindi parto en coa... po', rotendo el fià, se ciapa gusto anca a passar i altri e... avanti! El prim tòc gh'è la motoslitta dei vigili del foc entrà i pèi... sul giàz la slipega e la setta a passarme davanti, po' la se encioda e la ripasso ... e ogni volta l'è n'aerosol! Po', finalmente la slipega sul giàz e la finiss zò per el bosc, e podo tacar a respirar a pieni polmoni! Saltai for dal bosc bass, passém la malga a sinistra e en tòc de strada senza nef, i ne fa passar sui cartelloni pubblicitari, così no se perde temp a cavar sci e... no gh'è scuse de perder el ritmo! El Max e l Roberto i è bem pù envanti, e dopo averne passai alquanti, en po' de demoralizzaziom la me vem bem quando vedo boci de 13 anni che ciacera tranquilli e... che fadiga che ho fatt per nar a torli! 600metri fatti e ecco che salta for el ristoro! Na chichera de the en naranz e via de bala: ma chi elo lì davanti?!! Ahaha... el Roberto! Dai che ghe la fago! E allor, avanti a testa bassa e sulle pontère riesso a rosegarghe zò metri, ma sul pianom sora, la distanza l'è sempre la stessa. Entant riesso a passar en putèl vestì da bandito (col bandana sula bocca) che è drio a gareggiar co le ciaspole: diaolopo', g'ho mess 900m de dislivel a ciaparlo!!! Ma quant veloce erelo?!? Ultima pontèra e, anca per via dele pèl che ghe slipega, arrivo a morderghe le coe dei sci al Roberto e arrivém praticamente alla pari. El Max, l'è zà lì che l polsa da na desina de minuti. Dò bicieri de the calt e cavà le pèl ne trém en val: quattro curve sulla forestale che l'è nà pista e al Roberto ghe se spacca da mèz i sci da gara (che i è del sò vecio): incredibile! Senza neanca rugolar! E allor el Max ghe toccherà bem far da mediator e spiegarghe che no l'è stà a vegnir zò per i boschi. El Max, allor, arrivai ai primi sassoti (eeheh.. el g'ha i sci de oro! i mitici World Cup!!) el continua a pè, mi enveze, coi me veci Hagan, arrivo a sbasarme fim quasi ai cartèi pubblicitari piazzai sull'asfalto. 20minuti a pè sul giàz vif e ne trém al centro sociale de Tassullo per na bona magnada: e che bem! Polenta, salziza, fonghi, vim ross (e qi l'è mejo che me tegna... che po' devo guidar). Per le una poderesem anca partir, ma vist che volém spetàr le premiaziom (vist che al Roberto, essendo Juniores, i ghe regala el frontalim), ne la fem passar... el problema l'è che enveze che alle 1 e 1/2, avanti che i finissa le premiaziom vem le 4!!! Ensomma... en po' massa lenti!! Ma almen la cassetta de pomi ne la vinzém anca mi e l Max. E quindi, cargà su i gadget sulla vecia Polo, la fiondo en superstrada e n ten blitz sém a Roveredo, endò che per serar bem la giornada, ne bevem zò nà bona birretta a cà del Max...
| Pronti, via... le tutine le è pronte per na bela tirada de còl anca ancoi: fertig... LOSSS! | |
