SCIALPINISTICA Sulzkogel (A) del 25/05/2008
Sa gh'e' de meio de festeggiar el compleam sui asotti? Se ciava se som piega' dalle betoniere mpastae al gieri en cantier, se ciava l'alcol bevèst coi paesani fin mezzanot dal Mazzu, e se ciava anca se sto colp som da sol.... gh'è da nar! E quindi con sol tre ore de som, levo, preparo el zaino e torno a saludar en paess i soci, ancor en volta dal gieri e diaolopo'.... no i l'ha tolta massa bem che ghe som scampà propri a mezzanot... el momento che, compiendo i anni, avrìa dovèst steccarme zo de alcol dal tut! Ma alle 4, a vederme za en partenza en tenuta scialpinistica i resta a boca daverta (e quel mona de Gioppi ancor l ride a vederme ancor zoppo dal gieri sera.... diaolokan...al sera, a scherzar massa da séc el m'ha fat en lopez che me tocherà zopegar 3/4 dì!). Tra na monada e l'altra i me tegn ben lì a zugar con en caign randagio fin le 4 20...ma po', no podo permetterme de spettar altro... caccio la Polo en autobahn e per le 6 som al Brennero, 6 e 20 a Innsbruck e fat el pieno de metano a Kematen, me enfilo su per la Sellraintal fim enzima a Kühtai: la staziom sciistica pù alta del Tirolo... eh,eh.... parcheggio la Polo a 2000 e passa metri e... la nef la g'ho propri sotto el muss della macchina! I parcheggi de partenza per le varie scialpinistiche, sarà anca la stagiom avanzata, i è mezi vodi... su questa som sol mi, na macchina todesca e una de Innsbruck (ma altri scialpinisti, ghe n'era en partenza anca da Kühtai Zentrum per le zime lì entonro). Sarà anca vera che en Italia el temp el feva schifo (acqua a Bressanom, e senno' nuvole basse dappertut), ma la serenata prevista qi, me sa tant che l'è en ritardo. Purtroppo el zél l'è coert: nubi alte... ma el rigelo mel sogno! Vabbè... trao su le pèl, arva en scarsèla e via de balla a enseguir la coppia de Innsbruck: no me piass massa l'idea de restar ultim, vist che som da sol: se per disgrazia me scavezo da ultim a vegnir de volta... i me trova la stimana che vem! Se risale le piste fim al ristorante enzima, po' co na bella scavezada vers sinistra se traversa tutta la base della diga e se se enfila sul versante sinistro dela stessa. Adess gh'è la longa traversada de tutt el lac: almen 20 minuti.... e, via davanti enfont vedo che gh'è altre 4 persone ad anticiparme... som quasi tentà de nar a torli... e così, somenada la coppietta (tegnindome en pel pù alt sul lac), e arrivà enfont al lac, passà en par de bei slavinoni, me enfilo su per el canal, sempre pù ert, finché con qualche bella inversiom arrivo a saltar su en doss.... e da qi se entra en tel vallom sulla destra. El sviluppo l'è propri lonc, e entrando en tel vallòm raggiungo anca n'altra veciota davanti... quando la val (ex ghiacciaio) la par deviar a sinistra, se l'abbandona e se la mponta dritta per la forcella davanti. Gh'è almen 200 metri de zete sempre pù erte per narghe al vers, ma na volta su, se mola lì i sci e per grestina fazile fazile (eh,eh.... no serve zerto attrezzadura!) con 30 metri de marogne se arriva en vetta! Ore 9 e 30: Berg Heil Kepo! 2 ore e 30 tonde tonde dall'auto... Gh'è zà su en sior de IBK, e così ne aprofitto de far na bona ciacerada sulle condiziom delle zime en zona (eh,eh... anca elo i l'ha lassà da sol i soci... ormai, l'ha dit, i g'ha tuti sol voia de nar a rampegar!)... sempre ottimo per ripassarme el todesc! Trao zo la banana che me som tirà dré e entant, vist che per fortuna el temp qi l'ha rasserenà me fermo en vetta na bona mezzora a ciapar l sol: e qi el Teo el batte tutti per telefonarme a farme i auguri de bom complean... seguì dal Mich en 5 minuti e dal Max en altri 10 (diaolopo' che tempismi!!). Entant passa en vetta anca la coppia de Innsbruck partìa con mi dalla macchina, e così... per no restar ultim a smontar... g'ho da nar! I primi 200 metri per fortuna l'ha giazzà e quindi con for el sol, la sciada se la fa comodamente.... dopo, però el pappon l'è pesante, e anca se no se sfonda, l'è na bela stracada de gambe a smontar fim al lac. Qi se ripella per passarlo for e tornai enzima alla diga, se la mola fim zo alla macchina. L'è ormai le 11.... bel, bel, bel.... propri soddisfatto de esser riusì a farme anca la sciada del compleam... e adess? Me ero ben tirà drè i vestiti dale feste per nar a far l figo for per le vie de Innsbruck (co la scusa de magnarme la ciopa e biretta post sciada)...e quindi me trago en tel rì de acqua de fusiom (diaolopò che fredda) a darme na slavazada. Tirà a um per ben, però, na volta smontà en te l'Inntal, al distributor de metano (ghe fago na zonta de 2 euro... così arrivo a cà de vanz!) me compro anca na ciopa de speck: sento massa el som... se ciava la girada per Innsbruck: no vedo l'ora de arrivar a cà a trar zo i ossi! En realtà po' me fermo bem na mezz'ora sul ponte Europa a vardar quei che fa Bungee Jumping dal pont (l'è l salt pù alt d'Europa con 192m!), quindi ripassà el confim... me ritrago vers el brutt temp e per le 3 som a cà: a polsar? Macchè! Gh'è zà lì i parenti che me speta per farme la festa....
| Risalì le piste da sci, se scaveza via sotto la diga per na a ciaparse tutt a sinistra, all'argine e... | |
|
.... se la traversa tutta! Che longa! (foto fatta dala zima) | Finalmente enfont al lac, traversada la slavina, se taca a enfilarse su per n'ert canal e ciapar quota (la zima, l'è quella che domina lì sora).... | |
|
...finchè se ariva sul pianoro del ghiacciaio ormai estinto e.... eccola lì davanti a destra la meta!!! | Berg Heil Kepo!!! ...und... Alles Gute zum Geburtstag! ...e anca el temp ala fim l t'ha fat el regal de tirarse fora! | |
|
Molà en zò i assotti, basta ripellar dese minuti per ripassar for el lago (a 2350)... e n ten blitz se è alla macchina! (e anca ancoi alla fin i sarà 460Km!!!) | Tornando vers val... eccole de nof!!!(el prim incontro ravvicinà el gh'evo avèst via en Nuova Zelanda...) Le vacche dal pel lonc!! E le pascola en mez ala strada! Ma con quel giòm de peli en testa, da endo ghe vederale for??? | |
