SCIALPINISTICA Gruben Kopf (A) del 16/11/2007
En Austria la stimana passada l'ha trat zo na fiocada da foc... e allora besogn inaugurar la stagiom.... gh'e' da nar! Dopo en tour de force de 6 ore de aperitivi col Gioppi (...e si' che doveva esser sol na biretta dopolaoro!), finalmente per mezanot rieso, scavez, a scampar a ca'. La sveglia l'e' per le 5 e 1/2.... demo' per preparar el zaino! Vist el zero termico bass (a 1400 ancoi) podem tornela dolza e cosi' ne trovem alle 6 1/2 a Calliam col Luca e alle 7 a Trent col Bertold. El Gheda col so vecio el ne raggiungera' su pu' tardi... Solita tappa colaziom a Brixen e da li' en poi gh'e' tutte le zime belle bianche.... propri bel.... ma della stagiom che arriva nen rendem cont de colp al Brennero! Gh'e' for -10! E i operai che e' drio a laorar i g'ha su i Nepal Extreme!!! En quota gh'e' ventaz e infatti sfaliva: portada dal vent. Smontem 5 Km dal Brennero e ne trem a sinistra en la prima valletta: l'Obernbergtal, che risalim fim enfont al parcheggio a pagamento (quota 1400). E' sta na cagna narghe al vers, vist che con zo do dei de polver sulla strada ho riscia' pu' volte de doverme fermar a tirar for le cadene! Paghem i 2 Euro de parchimetro, saludem n'altro gruppo de scialpinisti 'taliani che e' drio a partir e trati i sci subit sotto i pei ne enviem per la forestale che ne porta vers l'ObernbergSee. Che bel polverom da foc! Traversa' i praoni con en par de malghette ecco che a 1590m arrivem al lago de Obernberg. Da qi costeggiem el versante sinistro del lac (per forestale) fim al bivio per el SandJoch. La gita l'e' za' tracciada: no g'avem neanca da perder temp a lezer la relaziom. Risalidi 100metri per en pendio, quando la spiana ne addentrem per la val fim a n'altro segnavia per el SandJoch che ne fa deviar e risalir el versante sinistro. Vers i 2000, enveze che puntar direttamente a sto pass, deviem a destra e raggiungem el GrubJoch. E se fim adess erem restai protetti dal ventaz, adess se leva de quelle folae gelide da paura! Che fret!!! Schnell!!! Manca 150 metri alla vetta, e qi el vent l'ha spazza via tutta la nef, sem drio a nar su per mughi e erba.... Encrosem 3 persone che e' drio a smontar dalla zima, ma no gh'e' temp de saludarse, massa fret e massa vent! Berg Heil! Me s'e' congela' enfim le lent della fotocamera digitale: per fortuna el Bertold, el fotografo ufficiale delle spediziom scialpinistiche, per no sbagliarse, sto colp el n'ha portae drio addirittura doe de digitali! Foto alla croce di vetta e confine di stato e ne trem sottovent a bever en bon goz de brule' che ancoi ho porta' drio: el se ghe voleva tutt! Zo le pel e.... zo! El Luca, avanti en perlustraziom, pensevo quasi el volessa cavar i sci i primi 100 metri vista la mancanza de nef, ma raccordando i vari canalini e con en po' de sci d'erba riusim a tornar al passo (GrubJoch) sci ai pei. Da qi sfruttem i vari accumuli e tra na serpentina su rododendri e na spolverada da 50 schei de polver sui residui de nef en tei canai, arrivem enfont alla valletta. Vers el lago de Obernberg, po', trovem en bel pendio en revers che l'ha mantegnu' fonda e polver: na figada a spolverar! Per mezdi e mez sem za alla macchina. E cosi' l'e' en must na pausa alla locanda de Vinaders (en la val) per na bona ciopa de speck e na birra media, quindi, dopo aver pers 1/4 d'ora en colonna en A22 (a Mezlombart s'e' rebalta' en camion con su 12 SUV!!!! Tuti embugnai! Diaolopo', danni!!!!) per le 3 e 20 sem za a Trent a pensar a endo nar doman. El Bertold, ancoi coi scarponi novi, el g'ha avest da far le sue viste le stigmate ai pei che gh'e' vegnu'! ...eh!!! No l'e' i scarponi che g'ha da farse, ma i pei! Beh, adess che i ha scominzia' a ciapar forma.... besogn mantegnirla! mai zeder, gh'e' da nar!
| Pellem e nem!!! Diaolopo', no par vera!!! L'e' inverno!!!! | |
|
Sci ai pei direttamente dalla macchina!!!! | ...e subit ne trem a guadagnar quota vers el lago de Obernberg... | |
|
...a tastar la nef.... l'e' propri polverom!!!! | Guadagnem quota vers el passo.... | |
|
ma dal GrubJoch en su.... gh'e' en vent che ne cava! Mai zeder! AVANTI! | Berg Heil! ACHTUNG! STAATGRENZE!!! Confim de Stato! .... no, no.... no g'ho zerto pressia de tornar en Italia! | |
