ALCOLISTICA Malga Maderlina del 10/11/2007
E finalmente e' arriva' el di' della zena de fine stagiom de dragon boat. I ha noleggia' la malga Maderlina sotto l'Happy Ranch en val de Cembra. Co l'Alberto me som organizza' de portarne drio anca i scarponi: se doman riusim a levar, nem a far na zima li' entorno: guai a perder giornada! Fin dalla mattina la giornada la ciapa na piega pitost alcolica.... Diaolopo', leva' alle 8 de matina, el vecio el vol tirarme subit en cantier a vernisar 90 metri quadri de perline col Nitro.... eh, no, eh!!! No podo miga brusarme la giornada per el mal de testa che me faria vegnir la Nitro! E cosi', anca se e' sta' difizile convizer el vecio ("alle 9 de mattina, mi bevo el lat! No el vim", el me diseva) ne trem en cantina a imbottigliar l'ultima damigiana de vim dell'an passa'. En laoro fatto ben, ma qualche bel goz el va zo de gusto e cosi', continuo de aperitivi al bar col Gioppi e dopo en par de amari per finir el disnar, me endromenzo za' steso sul let dalle 1 alle 4! Diaolopo' che tardi! Gh'e' da nar! Giust el temp de en brule' al bar coi soci del paess e raccatta' l'Alberto a Volam, via de bala per la val de Cembra! Arrivem su che za' i ha scalda' co le fornasele e parecia' i taoli: la Daria, l Fabrizio i e' vegnui su alle 2 e mezza a scominziar i preparativi! L'unica roba che me som dat da far e' sta' demo nar a tacar i cartei stradali co le indicaziom della festa (che per fortuna, vista la me calligrafia da gat, riesso a farme scriver zo dalla Lulu') zo per Cembra.... Tra na birra e n'avana cola l temp el vola e per le 8 e 1/4 ghe sem tutti e 27.... Prost e buon appetito! N bon piatt de pasta al ragu', affettati, sottaceti, frutta, torte, pandoro, 55 litri de birra, 20 de brule' e no so quanti de Havana Cola. Fini' de magnar, dopo en bel ciuciom de havana direttamente dalla suppiera fum en par de zighereti (diaolopo' che nauseada! Basta fum!!!!) e l'e' za ora delle sorprese. Prima i ne passa for la pagina de n giornale todesc (tradotta en taliam) che parla de noi e la nosa ultima trasferta todesca. Enfont po' i sera con n'indovinell della serie, endovina dalla foto chi che l'e' le putele che s'e' tattua' el drago sulle zinne... ensomma tutt bella roba goliardica! Po' ven el me turno e ghe metto su la canzom todesca che ha dat el via alla rumba en Germania e ghe ensegno el ballet della canzom! Diaolopo', tra raccattar el titolo, la canzom e el ballet som deventa' matt, ma n'e' valest la pena! Po', el Daniele el taca el proiettor e l ne fa veder la videopresentaziom della stagiom: che figada! (...eh,eh.... g'ho da dorrmandarghe i diritti d'autor.... ma voi propri linkarla, appena l me la passa!). Bevo quattro celletti de brule' e l'e' la volta delle presentaziom del Giaguaro che la prepara' en cartone del drago e en botta e risposta tra un pagaiatore e il drago: veramente bei! Altri 3 celletti de brule' e vist che l'e' za le 11 e n pochi i g'ha da tornar a casa a dormir, mettem su subit la presentaziom preparada dal Fabrizio: propri en CAPlavoro! (cap.... capitan!). Vers mezzanot, en pochi i va a ca' (tutti i altri enveze i stara' qi a dormir: al pian de sora gh'e' 25 letti!) e tira' for i taoli dall'uss fem pista da ballo e via de casim! L'Alberto l'e' cappotta'.... el diss che l g'ha mal de panza e l se tra' en branda che no l'e' ancor le una: diaolopo'.... ho ben capi' che doman, se nem en montagna el sara' bel polsa' e el me tirera' el col! Mi seto a bever... e misiar havana co la birra e l brule'. Vers le 4 sem propri tutti a passi (almen... mi de sicur!) e sera' su tutt alle 4 e 1/2 vago en branda: la sveglia l'e' per le 8 e 1/2! Ma no l'e' ancor finia! El Mattia e el Claudio i g'ha ciava' al Raz en calzot e le braghe del pigiama.... e taca a volar scarpe for per la camerata. Som propri cot... anca se gh'e' casim me endromenzo istess!
| La taola imbandia... e l Kepo con za' l'Havana Cola en man... | |
|
Ma l'attenziom la va subit all'indovinel del giornale todesc: "chi sono le tre pagaiatrici??" | ...sempre en zerca della soluziom all'indovinel, salta for anca el rugol de scotch.... | |
|
....e per far bever anca chi che no vol besogn esser convincenti! | Ma el bicier no l'e' mai vot.... anzi!!!! Questa l'e' el cellet con zo i 20 litri de brule'! | |
|
...el Kepo, ovviamente, su de giri... sa elo drio a far? A ballar la canzom todesca? Macche'! Varde' bem! El g'ha le scorze de mandarim en man.... el vol sbianzar l'obiettivo della digitale! L'e' propri brusa'! | ...spazzola' la zena, gh'e' za' el proiettor taca' per riveder la stagiom giust finia. | |
