ALPINISTICA Paganella EST (via Normale) del 13/09/2007
Prima che i novi friends i ciapa el ruzem, se rifa' vif el Matteo e l propone na rampegadela en falesia.... ma l'idea della salita dalla normale della parete Est della Paganella l'e' massa bella! Gh'e' da nar! Racatta' le varie relaziom e studia' per ben come arrivar all'attacco, mando na mail ai capetti en ditta disendoghe che entro tardi, quindi alle 7 e 1/2 ne trovem a Trent. I impianti de risalita da Andalo i e' daverti, e allor, pitost che farse 2 ore a pe' da Fai della Paganella alla zima, no rifiutem zerto el passaggio! En pratica, alle 8 e 3/4, dopo na bona colaziom en quel de Andalo, saltem sulla funivia e en vinti minuti sem enzima alla Paganella. Adess basta ciapar la pista "Nuvola Rossa" (quella che smonta ver Fai pu' a destra) e seguirla fim alla prima curva secca.... Da qi se e enfila en tel canalom Battisti. El senter el se tegn sulla destra del canal (...el me pareva bem en po' massa ert a ciaparlo de petto, infatti!) e se perde 200 metri de quota passando en costa alla parete.... Passa' en grop de mughi, se salta zo en ten camin (gh'e' en vecio spac engropa' che aiuta....) e quindi se segue l canal, fim a arrivar a en gerom... Propri qi, al centro se e' sotto na parete de 20 metri con sora en coert: ghe sem, la normale la taca qi! Trat su l'imbrago, spartezai friends, ciodi, rinvii e walkie-talkie, alle 10 e 1/2 el Matteo el se lancia sul prim tiro (el Kepo, vist che nol g'ha avest occasiom de nar ultimamente, el fara' la salita anca ancoi, ben volentera da secont!). Se salta su tra varie balze (e gh'e' anca qualche ciodo empianta'!...su sto tiro ne avem trovai 3), deviando vers sinistra, e dopo na quarantina de metri scarsi sem alla prima sosta all'entrata de en camin. Risali' el camino, dopo solo 20 metri gh'e' en bom posto de sosta su en giom de mughi, e allora, come evitarla? Qi perdem en pezot a zercar de capir come passar su: le do relaziom le diss de mpontarla dritta, ma da sora no se passa, e allor el Teo el torna endrio e smonta' en ten camin, el fa en bel travers esposto de 15 metri vers sinistra per nar a ciaparse en ten canal che se risale con qualche ciodo (el prim che se encontra l'e' un dei nossi!) e finir per far sosta a n'alber. Quando toca a mi da secont e vedo la corda senza proteziom, me sgarisso ben en poc a smontar en tel camin prima del travers de 15 metri, ma gh'e' da nar! ....e en te n'attimo som su. Sora l'alber se intravede en par de ciodi, ma endo sente finidi? No me par che la descriziom la parla de soste su per na pianta! Ghe trao n'ocio alla guida e.... diaolopo'! Sem finidi sulla variante Battistata: la sara' sol na variante alla normale, pero' l'e' pu' tosta.... qi finim sul IV+! Gh'e' si' en par de ciodi, ma anca en par de bei passaggi da far su tegnindo el fia' (....e mi da prim, li' no gh'avria zerto mess pe'!), po' sento el Teo che el tra' en zic: no, no l'era fioppa' zo! L'era sol per scargar la tensiom della serie de bei passaggini fatti! Con na sosta fatta alla bona su en cordin entorno a en sass encastra', passem su tra bei salti e arrivem en te n'anfiteatro endo' che ritacandone alla normale gh'e' na bella sosta... aggira' en sassom sulla sinsitra, se salta su da na paretina con en bel passaggim endo che, no essendoghe proteziom el Teo el ghe caccia rento n'altro ciodo, quindi risali' en canal de marogne che mola zo qualche bel maroc (ma tanto el canal el li devia alla destra della sosta...) arrivem alla sosta a corda finia....60 metri giusti, anzi 61, vist che la corda, quando me som envia' da secont l'era propri tirada! E adess, ne speta el toc pu' tecnico della normale, na paretina de IV con 3 ciodi. Fatti quattro bei passi e tribola' n'attimo a saltarghe for da en camin con enzima en mass... ghe sem! Sem alla grotta Battisti! Gh'e' el libro de vetta (...e a veder en te l'ultim mess sem la 4 cordata a firmar!)! Firmen, bevem, e...l'e' fatta! ....miga tant! Infatti, a vardarne entorno no l'e' ancor finia.... se riparte con n'esposto travers de 10 metri vers sinistra, quindi se la mponta dritta sfruttando en par de ciodi (e n'altro che el Matteo l g'ha trat rento... diaolopo'..la prossima volta ghe daro' i mei!). Ormai l'ultima sosta l'e' pro-forma vist che sem sulle antenne. Vardem l'ora.... diaolopo', le 16:20! E allora, convinti che la funivia la seresa alla mezza (....en realta' la sera alle 5 e 1/2), fem na corsa ai impianti (...che dolor co le scarpette da alpinismo a correr sui sassi!) e ne fiondem a Andalo a bever na bona birraccia. Tornai en quel de Trent per le 5 e 1/2, me sa en po' massa tardi sto colp per presentarme en ditta: beh, se ciava! N'avventura del genere la val bem en di' de ferie! E allora, dopo en salt en Pine' a scargar la macchina e magnar na pizza en compagnia, alle 7 som za' sul lac de Caldonazz co la pagaia en man. E stasera, vist che no ho sfadiga' assa', en barca i me passa de grado! Kepovoga!
| Se smonta en tel canalom Battisti... | |
|
...e prima de arrivar al gerom de attacco, se passa zo anca en camin. | ...Eh, eh! En sosta dopo el passaggio tosto della variante Battistata: che soddisfaziom! | |
|
...ma ghe n'e' ancor tant! | El passaggio pu' dur della via normale... e subit arrivem... | |
|
...alla famosa grotta Battisti.... | ...endo che se firma el libro de vetta. | |
|
Ma no l'e' ancor finia! Ancor gh'e' el bel traversim e n'altro toc bel esposto (varde' el Teo endo che l'e' taca' su!), e po', finalmente, l'antenna de vetta! |
