XIII PALIO DEI DRAGHI Palio dei Draghi (Caldonazzo,Canezza) del 26/08/2006
E finalmente e' ariva' el di' dela gara pu' attesa dela stagiom. Se fin la stimana pasada pareva no podesem partecipar perche' erem pochi pagaiatori (vist che come requisito de iscriziom gh'e' la barca piena), fortunatamente, anca se senza allenamenti e' torna' a darne na man el Piter, la sorela del Luca e l Gabriele. E cosi'.... gh'e' da nar! Sveglia la matina ale 5 e meza, e dopo na colaziom en tangenziale a Trent ne trovem tuta la squadra ale 7 in punto a S.Cristoforo. Prima de tut gh'e' da sciolinar la barca (pori pesci, la sciolina l'e' pezo del DDT!), po' gh'e' da traversar el lago (pagaiando) per portarla alla partenza: Caldonazz. Allesti' el gazebo, i ne spiega le regole: come sempre i l'ha fate zo dopo quattro (penso anca de pu') candole de ros straz tolt su da qualche caneva: en pratica i ha misia le qualificaziom ale 2 competiziom dela giornata (Palio dei draghi e Palio dei comuni d'Europa). Pasa en finale le prime do squadre de ogni batteria (da 5). El problema l'e' che la batterie i l'ha sorteggiae tolendo barche da tuti e doi i tornei e cosi' se gh'e' batterie endo che gh'e' 3 barche che lotta per qualificarse per el Palio dei Draghi, la nosa batteria sem tuti e 5 en competiziom per la finale (che sfiga!). Adiritura el Pine' l'e' en batteria da sol (per el Palio dei Draghi)... cioe' automaticamente en finale! Vabbe' alle 10.40 toca a noi. I allineamenti i e' abbastanza veloci... "equipaggi pronti! BANG!" E anda che nare. En po' massa... no riusim a tegnir el passo regolare ma nem en po' massa su de ritmo... All'arivo (500 metri) sem.... terzi a 70centesimi dai secondi: diaolopo' che sfiga! Ne toca partecipar alla batteria de ripescaggio. Enveze no! En pratica el secont qualifica', el Romallo, i eva partecipa' ala gara en 18! Ma i giudici alla partenza n'evei controlla' sol noi? Com'ela che no i s'e' ascorti che no i era barca piena? Sara' sta' le esalaziom dela sciolina! Ala fin, quindi, i squalifica el Romallo e... sem en finale. Ne trem cosi' al bar a magnar e bever (ma sol na biretta) fin le una, spetando che i ne ciama per le finali delle 15:30. Entant ariva anca me cosini, la Cristina e l Florio (ormai fotografo ufficiale del DragonHeart): i doveva portar su anca i me veci, ma come sempre, i ha trova' la scusa de restar a ca'. Sto colp adiritura i m'ha manda' na delega scritta! L'e' ora, nem fora a scaldarne e po' ne preparem en "acqua 9". Dopo le molte raccomandaziom del capitano sul ritmo costante e no masa sostenu' da mantegnir "POTENZA! NO VELOCITA'!!!" ne preparem all'attacco. Sara' che s'ha leva' el vent, sara' che sto colp sem 10 barche da allinear... stem coi brazi for all'attacco zinque minuti. Finalmente se parte. La prima meta' el passo l'e' buono.... po' come sempre ne ciapa la foga. Arrivati! Chi ha vint? Mah... i e' tutti li' li'... i g'ha da controllar el fotofinish. Alla fin el palio el lo vinze el Ca' Rossa davanti sol 20cm alle Nutrie. Noi sem...boh! Da fora, i me diss che sem sesti: che lusso! Po' en realta' sem ottavi (sol en metro endrio el Pine' e el Levico). Vabbe' alla fin podem eser contenti istess, vist che avem tegnu' la stessa posiziom dell'an pasa' (ma come barca sem de zerto men alleanadi).
Se daverze el frigobar e via de birre! Peca' che dopo mez'ora i ne diss che dovem partecipar anca alla finale del Palio dei Comuni d'Europa! Noi??? Diaolopo'! El Piter l'e' za' na' a empastar pizze... ne manca en pagaiator! Per fortuna riusim a sostituirlo con uno che era vegnu; a far el tifo per noi: anca se no l'ha mai pagaia', e noi avem za taca' de birra...gh'e' da nar! Sto colp arivem decimi (ultimi), ma de zerto la nosa gara l'evem za fata prima, volevem sol veder se riusivem a migliorarne col ritmo de pagaiada. Smonta' i gazebi, podem cosi' riportar la barca a S.Cristoforo e dopo na birra al Sedran, nem a Canezza per la festa e la zena de chiusura. Gh'e' bem su quei del Romallo che i g'ha en diaol per cavel con noi, perche' i e' stai squalificai, ma ala fin, dopo le premiaziom, el Gianni e l Fabrizio i li ciapa da parte e i prova a calmar le acque. Dopo 2 birrette, quando taca a arivar le candole de media.... som propri cot, no gh'e' caffe' che tegna. L'e' meio che me traga a ca' de bala prima de brindar massa! E cosi', dando en te l'ocio el men possibile me defilo.... gh'e' da nar...a polsar!
El gruppo de pagaiatori... Entant che speto de riveder me cosini (Cristina e Florio) che me porta le altre foto.... contenteve de questa! |
 |
|
Ste pagine l'e' stae cargade volte da visitatori dal 3 de agost 2005
