CASCATE DI GHIACCIO Val Daone del 27/12/2005
Eh sì, i rambo 3 i fa propri na bela impressiom e ala fim me i som regalai per nadal…. Gh’è sol da nar a provarli. E così ne sem trovai col Davide a Riva ale 6 de matina e soto na bela fiocada ne sem enviai vers la Val Daone. Pareva sol na spolverada, ma arivai en val, la nef vegnua zo l’era parecchia e l’eva zà scoert, a ocio, le cascate fazili. La strada l’è sbarrada al Lago di Malga Boazzo.. ma endo nar a spicozzar? Ala fin, decidem el circolo del giaz, al lago de Malga Bissina: vist che l’è pù alt de quota el sarà formà. Ne enviem così a pè…. E cammina cammina…. Ma quant’ela longa?! Fatto sta che l’ultim toc de strada no l’era neanca traccià e avem fat na fadiga bestia a camminar en 70 schei de polverom… Vers le 10 e meza arivem finalmente ala diga e…. diaolopò! Altrochè giaz! Ghe sarà ancor soto le turbine dela centrale elettrica che gira con tuta l’acqua che vem zo! E così…. tornem sui nosi passi e ne enviem en zo. Provem così a zercar la cascata Inca (grado 2), e dopo una ravanata da foc e arrivai al presunto intaglio da endo che doveva esserghe l’attacco no trovem nient. Riprovem da pù en bass e dopo n’altra tribolada su per el bosc arrivem….ancora al stesso punto, ma da sotto! Che sfiga! Di fronte entant vedem la “Giazzo Pazzo” un 2+… sarìa bem da farla…. Se sol no fusa zà le una dopodisnar! E così delusi, ne enviem vers la macchina…. Ma cammina cammina, a sinistra della strada trovem en bel salt de giaz verticale (altrochè 2+!!! L’è tut giaz e candele a 90 gradi!) co la possibilità de pasarghe la corda da sora en tel bosc. E così no ne fem sfuggir l’occasiom! Entant che el Davide el deventa mat a desgartiar la me nova mezza corda (eh… anca quela per Nadal!) e el la mola zo dale piante, mi me trao su i novi rambo 3 e…. gh’è da provar! No som neanca mez metro da terra che me sbilancio…. L’è meio che ghe riprova pù convint e con pù equilibrio… le do ponte dei ramponi le enfilza le candele de giaz come che fussa burro le picche le entra con violenza en tel giaz e così spicozza spiccozza arrivo enzima… ma che cota de brazi! L’è così el turno del Davide, e anca lù con quatro bele traziom de brazi el passa fora, ma a differenza de mi el g’ha pù la tecnica del dry tooler: le picche envenze che empiantarle a scarpae el le posta e… le sta su istess. La rifem do volte per un e l’ultima se n’aprofitta anca per provar a mpiantar i ciodi da giaz…. El giaz l’è bom, i va rento senza tante storie. Ne enviem così vers la macchina, tuti sodisfatti dei nosi novi Rambo 3 e dopo aver fat do ciacere con do putei che era vegnù a provar “la regina del lago”, ma tornai sui lori passi per le condiziom dela cascata, ne enviem vers cà. La sarà nada mal che la cascata entrega no l’avem fata, ma le spiccozae da secondi sul vertical ne le sem propri godeste.
| Dopo aver cammina’ nella tormenta fin Malga Bissina e tornai sui nosi passi… | |
|
…avem mess su ‘na sosta sule piante per far la cascadella sora strada. | El Kepo alle prese coi so novi Rambo3! | |
|
E anca el Davide el li testa subit…. en dulfer! (el li g’ha novi anca lu) |
