SCIALPINISTICA Cima Livi/ Lyfispitze del 02/04/2011
El calt vergognoso che l'ha fat i ultimi dì, de sicur no l'ha lassà ormai pù polver a nord, ma a sud, se fussa da nar alti e partir bonora...
E così me organizzo col Bertold en ufficio al vendro dopodisnar: gh'è da nar a far la Punta Livi: en val Martello, sud secco... basta partir bonora! Se taca al gruppo anca l Renrav e alle 5 ne trovém al Zuffal per trar i assotti en la Golf. Per le 7 men en quart sém zà lì che cavém for i assotti en tel pantan del rifugio Gioveretto (a 1880m.... sotto i tornanti de testata della val), e ne enviém su per el senter a destra dela strada... sci soto i pei, ma se no l'è l'ultim dì che se parte da qi, poc ghe manca! Scavezém su per el bosc ert e passà na malghetta se vede chiaramente el vallom che entra rento, e che gh'è da seguir senza error fin soto la zima.... beh... senza errorr... el sol el ne ciapa praticamente subit for dal bosc... mi el Bertold seguim a logica el vallom, el Renrav enveze ancoi el se stacca per nar a zercar salite alternative su per le greste... El ritmo de salita l'è sempre ottimo e l Bertold nol se smentiss da corridor: g'ho da far le mie a no farme distaccar massa! pianor, salita, ne tegnim en po' a destra e seguendo vecie traccie giazae e sfondae, dopo en par de ore a testa bassa ecco che ne salta for davanti el pendio finale: quel ert! Per narghe sotto, trago sotto i rampant che i è sempre pù comodi che strozegarse su con bruti pensieri en testa de rugolar. Alla base del pendio encroso n'altro skialp che el fa ancor pù el comot trando su direti i ramponi e, giust el temp de saludarlo, che vem for esser el guardiaboschi fassan che conoss bem i me cosini de Canazei (diaolopo', el mondo l'è propri piccol)! La pontèra mi e l Bertold la aggirém da sinistra che par nà roba men erta e pù fattibile, quattro zete, po' sula gresta finale i ultimi 50 metri lineari i è propri massa en pè per i me gusti: mi no vardo n faccia nessuni e... molo zò i sci arrivando al Berg Heil a pè. El Renrav l'è ancor zò che l ravana per greste, e entant dò putèle le ne domanda la foto de vetta, quando el Bertold el diss che ghe par de conosserle: ahahha!! una l'era l'istruttrice de inglese che era vegnù en ditta 5 anni fa a far i corsi de lingua! Trém zò qualcos, spetem el Renrav, foto de gruppo e vers le 10, quando el firn el par còt a puntino trém i assotti sotto i pei e la mollem vers val. El prim toc l'è propri na bella sciada, ma po', 600 metri sotto, en la prima piana taca i problemi e a tòchi se sfonda... diaolokan... che terror che g'ho de rugolar che no me torna for la spalla: no podo permettermel! Arrivai alla malga alta ognuno ciapa la strada che ghe par pù comoda, e mi per na forestale ciapo la direziom de testa dela val e... che casim! A momenti fago sfondae fim en vita! ...e anca na capriola che me trovo de schena enfossà en te la nef! Ensomma... quaranta minuti da panico e finalmente eccome alla macchina!!! E sto colp, co la tribolada fatta, el Berg Heil el fago all'arrivo! E quindi adess na bona ciòpa col speck e birra media nol ne la cava nessuni prima de tornar en val!
Partim de bala su sora el bosc del rifugio Gioveretto... |
|
|
..e arivem prest en campo aperto: ne basta puntar dritti dritti enfont al vallom... |
l'è nà salita continua, ma ambiente propri selvaggio con drio i ghiacciai delle Venezie e la Marmotta... |
|
|
..fatta la pontèra finale e molà i sci 30 metri sotto, arrivém al Berg Heil... |
..dai dai Kepo... basta vardarte entorno (drio el Gran Zebrù e Cevedale)! gh'è da nar, che l sol el magna le ore e l cose la nef! |
|
|
...e quindi tornai al skidepot, la mpontem zò dritta per el prim pendio e po'.. beh.. gh'è da far en bel poc a sfondar! |
Ste pagine l'e' stae cargade volte da visitatori dal 3 de agost 2005