SCIALPINISTICA Eidachspitze aus Pfundres/ Cima Terento da Fundres del 03/01/2011

Vist che l'altro di' la cima Terento l'evem vista tracciada dal'Ofen/sud, ancoi allor la provem da nord: ghe sarà pur qualcheduni che l l'ha fata anca de qua... e nveze! Partim co la vecia Polo ale 6 e 1/2 da Roveredo co l'Andrea, alle 7 e 1/4 a S.Michel co la Pamela, e dopo la doverosa colaziom en te l'autogrill de Brixen, ne enfilem su per la Val de Funfres fim all'ultim paess... a zercar l'attacco. Gira che te rigira, dopo na mezzora a girarghe entorno ecco che trovém la forestale che entra en tel vallom, subit prima dell'entrata en paess a destra. Arrivém al parcheggio (en spiàz da 2 machine da ndo taca na tagliafuoco) e a parte no esserghe nessuni, no gh'è neanca traccie! Ne enviém su per la forestale e dopo n'ora a testa bassa i primi 600 metri i magném e arrivém a en bivio che, mpontà su per l'ert sentér de destra e quindi taià su per en praom, el ne porta al bait come da relaziom del Gionco. Adess dovém taiar su per l'ert bosc e co l'Andrea davanti che batte traccia, la Pamela drio che la bèga co le erte zete e mi che fao da intermediari, guadagnem altri 300 metri che i ne porta finalmente al punto che l bosc el cala de pendenza e arrivém al limite del bosc per entrar en ten vallom... frigorifero! Diaolopo'... sarà almen 25-30 gradi sotozero ... no gh'è manopole o bereti che tegna... i diaolini i vem istess... entrém veloci en tel vallom tutt a nord, tegnindo al centro e passando sotto a sinistra della nossa zima, quindi sempre co l'Andrea che batte traccia, ecco che con 8 erte zete saltém su al pass a caval della Pustertal. Adess gh'è da perder 200 metri su nef giazada e quindi ne speta i ultimi 300... Finalmente pero' al sol la va meio! Persi 50 metri tutti en travers giazà, l'Andrea el ciapa el largo e vist che no par po' na bella sciada (giaz su e su) l'ultima pala per l'Eidachspitze, la Pamela la preferiss fermarse qi e magnarghe sora. Mi ghe fago compagnia: Berg Heil e, dopo 5 minuti sentà su en sass giazà, prima che me vegna el mal de l'ors, g'ho la pessima idea de sentarme sora el zaino e...crack... va a farse ciavar i me ociai da ghiacciaio! Beh... va ... ho fat giornada! Tornà l'Andrea e risalidi al pass, enveze che tornar per el fitto e erto bosc, ciapém en canale che smonta direttissimo! Ancor pu' ert, ma ... che bel! En te n'attimo sém zò (alla fim, dopo qualche tentennamento, la se mola for anca la Pam) alla malga e scavezà via alla destra del vallom, per prai su firn e forestale torném en ten blitz alla Polo. Bel giro! E allor adess l'è doverosa na bona ciòpa de Speck e birraccia media zò en paess all'inizio della val de Fundres. Adess, lassa pur che l temp el peggiora, noi, co l'avventura de ancoi, per en par de dì podém anca polsar le gambe!




Passada la forestale e la malga ne inerpichem su per el bosc...


quindi su per el vollom freezer...


..finchè raggiungém el pass...


...e calando 100 metri el porta alla vetta...


Berg Heil (mi e la Pamela el fém direttamente al pass).


E po'... basta molarla dritta per l'ert canal... che sui praoni della malga... gh'è enfin el firn che ne spèta!



Ste pagine l'e' stae cargade volte da visitatori dal 3 de agost 2005