ALPINISTICA Tschenglser Hochwand del 10/07/2010

M'eva accennà da 'na stimana en ufficio el Roberto dell'idea de far la ferrata della Croda de Cengles e, tra el calt previst e l test de traziom alla spalla nova, l'è n'occasiom da no farse scampar: gh'è da nar! Zà che gh'ero po', ho anca cambià el dissipator da ferrata, vist che quel vecio ormai l gheva dese anni... Ne trovém alle 6 a Trent en ditta col Roberto e l Giampiero e per le 8 sém zà a Solda a far colaziom en attesa che ale 8 e 20 ne davèrza la seggiovia Kanzel per guadagnar subit 400 metri de quota. Saltai zò dall'impianto ciapém subit el sentér a sinistra co le indicaziom per el rifugio Serristori. Dopo neanca zinque minuti a pè, ne trovém el sentér sbarrà per caduta sassi co l'indicaziom de sbasarne en la valletta e guadagnar quota dall'altro versante... la tentaziom l'è ben quella de far i 'taliani... ma po'... dai.. g'avém tutt el temp: e allor fém i bravi e seguim le indicaziom. A 25minuti scarsi dalla seggiovia sém zà con calma sul greto del torrentèl che smonta dale zime entorno e scominziém la salita che con quattro curve en te na quarantina de minuti la ne porta ai 2721m del rifugio. El Giampiero no l'è al top dela forma... el diss che semmai entant che noi saltém en vetta dalla ferrata nova (pù erta ed esposta) elo el ne raggiungerà su per la ferrata vecia... Ripartim en tel vallòm lassandone a destra le imponenti zime della Vertana e l'Angelo Piccolo, quindi traversà en pianoro, deviém a sinistra su per en geròm e ne embraghém. Pronti a zercar l'attacco della ferrata... mi e l Roberto ciapém la prima scaletta che trovém el Giampiero enveze el continua dritt per far la ferrata vecia (pù fazile). Ne trovém subit su en par de scalette senza cordim de proteziom, passaggi esposti non assicurai e cordini veci... ma come???!!! E allor ricontrollà la relaziom e controllà co la tecnica delle lancette dell'oroloi l'esposiziom Sud della ferrata, capim che en realtà erem finidi sulla ferrata vecia!!! E allor ne girém e nem de balla a seguir el Giampiero che entant el s'è zà dileguà en velocità su per la ferrata nova. Tacà el prim moschettom e subit gh'è la tirada de col del passaggio tosto, esposto e strapiombante: l'è demò dò cambi de moschettoni, po' la se posta n'attimo e se ciapa confidenza col vuoto: bella e divertente, ciapém quota su na serie de plachette e spigoi attrezzai, quindi quando ormai sem en vista della vetta ecco che ne ricongiungém tutti. Facile passaggio di placca finale tegnindo el cordim e fasendo contrapposiziom coi pei e saltém sulla gresta endò che se ricongiunge le ferrate vecchia e nuova co la via normale alpinistica... Berg Heil! Ne fermén su 'na bona mezzora a bever e becolar qualcoss, quindi, vers le 1 ne enviém zò spediti per la via normale. E qi purtroppo al Giampiero ghe salta for i crampi ai muscoi dele gambe (pei compresi) e, tra strechting e pause smontém molto lentamente... l'obiettivo, a sto pass qi l'è no perder l'ultima seggiovia che sèra alle 5, anca se con davanti tre ore doveresem esser abbastanza larghi. Smontai finalmente en la piana el Roberto el se carga anca el soò zaino sula schéna, e mi entant, vist che ho finì l'acqua parto spedì da sol per el rifugio per beverme na radler media: quando i arriva, som pront a ripartir... ultima discesa vers el rì e per le quattro scominziém la risalita vers la deviaziom che ne porta alla seggiovia: i toni e le nuvole le minaccia grandi temporai, ma mi, finché me sento el vent en faccia som tranquil (vol dir che l temporal, aspirando aria da n'altra direziom - e spuandola a noi- no l'è drio a puntarne). Per le 4 e 35 finalmente saltém sui caregoti e en dese minuti sem en fondoval... arrivém all'ultim pal della seggiovia propri entant che sull'arrivo se fa en ghirlo che l tira su en polverom che sconde via tutt: per fortuna el passa subit e el ne sparmia! Saltai en macchina, vist che l Giampiero el zopega vistosamente, el pilota el lo fa el Roberto e dopo na bona birraccia en quel de Schlanders, per le 7 sém a cà a pensar alla prossima: ehhehe... la proposta che i me fa per l'Hintergrat a fin del mess la me stiza tant... ma forse prima no sarà meio che me daga en po' alle roccette? Vederém, ma de zerto... gh'è da nar!




Smontai dalla seggiovia Kanzel, ne enviém a sinistra per comoda mulattiera..


Passà en par de ponti caratteristici, ne toca smontar en la valletta (per riscio caduta sassi da destra) e risalir sul doss enfont...


...fin al rifugio Serristori (e drio al cospetto de, da destra: Ortles, Zebrù e Gran Zebrù)


Ne addentrém oltre el rifugio passando sotto la Vertana e l'Angelo Piccolo (VertainSpitze e Kleine Anggel)


Quindi... ecco la nosa zima! El zimon a sinistra! E allor ciapém quota sui geroni fin a ciapar la ferrata...


...girandoghe le spalle a Vertana e Angelo Piccolo...


En neanca n'ora de ferrata, a tratti bella esposta e anca erta....


Ne ricongiungém en vetta alla via Normale che ne porta al Berg Heil!


E quindi, smontai per la via normale dal canalom de gièra (che dovrìa corrisponder anca alla scialpinistica invernale)...


Podém molarla vers val, prima de ciapar brutt temp.



Ste pagine l'e' stae cargade volte da visitatori dal 3 de agost 2005