SCIALPINISTICA Sasso Nero Schwarzenstein(A) del 26/04/2010

Eh.. el Sasso Nero, gran bella zima, la tentaziom de farla da nord, la tegno lì per quando la concatenem co la GauderFest e allor per ancoi, prima che la nef la se alza massa de quota, la fem da sud. Partì da casa (de Innsbruck) alle 4 e 1/4, per le 5 me trovo al casèl de Brixen col Davide e l'Andrea che vem su dal WelschTirol. Na bona colaziom appena emboccà la val Aurina, quindi per le 6 sém zà al bivio per nar su al mas a Stalilla (1472m) a fine strada sora St. Johann im Ahrntal. En dò minuti som zà col zaino e sci sula schéna, enveze sto colp el Davide el la tol propri dolza (neanca na figa che se tira a um la matina la ghe mete 'si tant!)... e finalmente per le 6 e 1/2 ne enviém a pè su per la forestale senza nef. Qi, l'esposizione sud l'ha zà alzà parecchio la quota nef quindi ne tocca camminar quasi na mezzoretta per arrivar alla malga e finalmente postàr zò i assotti. Se segue el vallom e se entra rento empontandola sempre pù dritta con mili zete tra i radi mughi, po' tegnindose en pel a destra se passa for en par de balze men erte quindi arrivai sotto el paretom de roccia dopo en par de ore de salita, finalmente ne fermem a bever en goz. Qi raggiungém anca el gruppo de tedeschi che ne anticipeva e da adess (propri el limite dell'ultima fiocada) la traccia ne toccherà farla a noi! Ne sbassém con en travers sotto le rocce vers sinitra al centro della val (su per le ròste gh'è la ferrata estiva che porteria al rifugio, ma adess l'è demò na cascata de giàz!) quindi l'è la volta dell'ert pendio che sbara su al rifugio.... ehehe... bella erta e anca na bella ravanada vist che sora en strato portante de nef, gh'è su altri 20 schèi inconsistenti... ghe pensa el Davide a tracciar su e su, envenze l'Andrea, che ancoi l'è en difficoltà per el péss avarià magnà al gieri a zena (dela serie, ogni muga la deventeva en crosét: eheh... vedè cosa sucede quando noi tirolesi volém imitar massa i taliani?! Eh eh...L'avrà trat zò le cozze avarie de Porto Marghera) el prova a scavezar su per na fasa de roccie che salta su diretta al rifugio: na cazada, perchè, per via dela nef inconsistente sulle roste, l'ariva su 20 minuti dopo de noi. Entant vegnim raggiunti anca dai 4 bavaresi che però i se varda bem da passarne davanti a far traccia! El Davide el sèta allor da prim a tracciar en mèz metro de polver... che fadiga! St'an el ghe n'ha rento 'na sbancada! Mi no me la sento propri de passarghe envanti ghe lasso far... Oltre el rifugio Vittorio Veneto, se entra per el ghiacciaio austriaco e saltai sulla dorsale a sinistra, trati i sci sul zaino se passa for co la picca la corniss che ne porta sulla piana glaciale che salta en vetta. Altro giròm en senso orario vers la cross davanti e per mezdì (l'è stà eterna per via della nef da tracciar) sém al Berg Heil! Magném bevém e... ne trém! La parte sora del ghiacciaio l'è na figada de pulverschnee, quindi saltai zò dalla corniss sci ai pei (l'Andrea el se permette enfim de rugòlar zò dala corniss!), passém sotto l'ert pendio del rifugio e qi, anca per via della nef marza sul strato trasformà, ghe dago na bela lustrada. Travèrs veloce sul pianoro, quindi i pendii che ne sbara sulla malga i è del bel firn...e g'ho da far le mie a starghe drio al Davide che l se fa ciapar la man a sciar en velocità. Sotto i 2000, ormai se va su nef marza, e sfruttando le varie lengue de nef a destra, riusim a smontar en bèl tochét fin ai 1700m. Ultimi 20 minuti de camminada e sém de volta alla macchina, quindi, dopo 'na pausa Radler e Wurst mit Senf und Brot a Campo Tures, tornai a Bressanom ne saludém pensando zà alla prossima gita e per le 5 e 1/2 som zà de volta a Innsbruck.




Pronti a partir dala macchina: ehh.. la nef l'è bem lontanòta..


Finalmente dopo mezzora a pè arrivém a trar zò i assotti propri davanti alla malga...


quindi se taca a ciapar quota su per el vallom... e avanti de zete su zete fim sotto al rocciom che se vede su alt a destra..


arrivai al pianoro, ne sbasem e fem en travèrs per aggirar el rocciom...


...e risalir l'erto pendio...


...che con dò erte (e su nef inconsistente) zete el ne sbara su al rifugio.


Guadagnà altri zento metri de quota sul versante austriaco, puntém a passar su dala corniss (la zima l'è quela davanti a sinistra)...


...e con n'ampio semicerchio fim en vetta!


Berg Heil alpinisti! Complimentoni al Davide che ha fat traccia, all'Andrea che anca en condiziom precarie de salute el s'è fat for quasi 2000 metri anca ancoi e al Kepo che ... beh... elo el se li merita sempre ;-) !


La cross de vetta del SchwarzenStein: bella, ma poc fotogenica: dal davanti no se pol propri fotografarla, l'è su en scròz de 400metri! E adess... se pol molarla en super pulver schnee!



Ste pagine l'e' stae cargade volte da visitatori dal 3 de agost 2005