SCIALPINISTICA traversata Travignolo-Vezzana del 24/02/2008

La traversata dele Pale de S.Martin.... n'OSA diaolopò... Ma relaziom engiro non trovo, e così, zerte volte, l'è anca meio partir de ignoranza... zerto che picche, ramponi, imbrago sto colp mei strozego ben drio volentera! Dopo el calt atroce del gieri (quei che è nà i parleva de sci nautico) se decide per na partenza bonoriva... chissà che la sciada de rientro, riusendo a farla a ore decenti la poda esser anca renumerativa! E così el ritrovo l'è per le 6 a Pèrzen. Se en Folgaria alle 5 e 1/2 l'era +5, chissà quant che troverém a Bellamont! E enveze, quando ne fermén lì per colaziom, sarà anca la val serada, ma l'è demò -2! Buono! Almen stanot en pel avrà rigelà! Tolt el bivio per el passo Valles e parcheggià subit al parcheggio all'inizio del val Venegia, trém i assotti sotto i pei e... alle 8 e 1/4 ne enviém de balla per risalir tutta la val. I altri 3 disgraziai i g'ha da ghignar e torme per giro en bel poc quando i me vede partir co le braghette aderenti da gara... ma d'altronde col calt che farà ancoi, le ho pensae tutte per vestirme lizér... anca se come scialpinista da scrozi, a dir el vera, vestì così me sento en po' a disagio. Passà for el bivio per el Mulaz e risalidi altri 100 metri vers el passo Rolle, deviém finalmente a sinistra en direziom de en canalom che se vede su... diaolopò... pareva de dover far na longa salita, e erta fin i 50 gradi.... ma a vardar su, par tutt lì e tutt na monada! Ma sarà vera? NO! "Ancoi g'avem tutt el dì, podem tornela comoda" ha ditt el Mich... ma en neanca 3 minuti, l'è zà lì che el va su a manetta (azz che tirada de col!) de zete per saltar sul ghiacciaio del Travignolo. Giust 2 minuti de pausa per en goz de acqua e se riparte en direziom del canal sempre pù ert. Dopo 100 metri, per no strozegar massa le lamine, anticipo i altri de 3 minuti en tel montar i rampant, e ... subit la se empenna ancor de pù... quindi, trati i sci sulla schena, la mponto dritta co le do picche en man (i altri i prosegue la progressiom sol coi bacheti da sci... ma en par de picche me digo le g'avria fat propri comot!). Sempre pù erta e.. diaolopo'! el canal el se sèra entrà le ròste. Al Gheda, che è davanti ghe parte en guant dal zaino, e co la scusa che ghel ciapo al volo, el baratto co na strozegada de corda su per le roccette! Gh'è zà ciodo e sosta pronta e passà su anca l Luca e Mich (co n prusik entorno alla corda fissa trata zo), en qualche modo me strozego su anca mi (ormai seppellì de nef). Empontae de nof le picche en la nef sem pronti per i ultimi 50 metri, i pù erti: e qi infatti le picche i le tira ben for dal zaino anca i altri! Finalmente el sol!!! Sem for dal canal! G'ho i diaolini ai dei e 5 minuti boni i me se ghe vol tutti per riprenderme. L'è zà le 11 e 1/4, e la zima Vezzana, che l'è alla nosa sinistra, adess la par na monada: sci con rampant sotto i pei e su per i ultimi 250 metri! I ultimi 50 molèm zo i zaini e i fèm per sentér de gresta a pè: Berg Heil! Diaolopo' che posto! Sotto la cross gh'è demò en foss de 1500 metri con zo la val Venegia, al de là, enveze, vers la val del Strut salta su la ferrata.... e noi doveresém saltarghe zò coi sci!!! Girà i attacchi ne fiondém allor en quella direziom a vardar sa che ne speta. Passà for na bella pontèra se arriva al palét ross che segna l'inizio della ferrata: l'è scoerta dala nef, ma da sinistra, passai for i primi trenta metri picca, faccia a monte e sci sulla schena, podém smontar zò. Finalmente arivém en val del Strut, e qi l'ambiente l'è propri selvaggio: la sciada per smontar en val l'è propri longa anca se non l'è polver: besognerìa spetar en par de ore de sol per aver firnaccio... adess l'è tra el pesante e la grosta. A quota 2200 la val la finiss en ten dirupo de 300 e passa metri, e allor cavai i sci fém en travers a sinistra per entrar en la val che ne butta al pass dele Farangole. Traversém quindi assotti sotto i pei el pendio, guadagnando quota e lasandone a destra el dirupo de 200metri entrèm en tel vallom. L'è le 1 e 1/2, e l sol qi la nef el l'ha zà bella cotta: al Gheda (davanti) ghe se sfonda la traccia en par de volte, e alla terza.... si salvi chi può!!!! Diaolopo'! La sfondada de traccia da sotto el sci, la fa partir en metro de nef (gh'è sotto erba) che se envia vers val deventando sempre pù granda e portandose zò tutt el pendio en tel salt de roccie da 200 metri.... e che rimbombo!!! Panico! Per fortuna no erem drio a progredir a zete, ma allineai un drio l'altro, altrimenti.... E adess sa fente? Zerchém de guadagnar quota sul pendio vers sinistra (e qi nem su de zete col cor en gola) che l'è pù ombreggià, quindi arrivai en la piana tirém el fià. Puntà al passo delle Farangole (i ultimi 10 metri sci en man) arrivèm finalmente en vista del vallom de discesa. Anca qi gh'è en salt de sci ripido che mi desmonto sci en man per 3 metri, po'.... gh'è da nar! El Mich e l Gheda, for dal canal i vol concatenar el Mulaz (altri 500 metri), ma mi per ancoi ghe n'ho assà (anca perchè som ancor sgarrì dalla valanga e en esposiziom sud, con sto calt no me la sento propri de tornar a ciapar quota!), quindi col Luca ne fermén n'ora su en sass sotto el Mulaz a spetar che i faga zima. El Luca l'ha optà de sparmiarse el Mulàz perchè dopo 2000 metri de dislivèl el voleva tegnir en po' de forza per stasera, che el g'ha n'altro incontro galante zo per l'Italia col so vecio . I va su come i balini e en n'ora spaccada i ha zà fat i 500 metri de salita e discesa: per le 4 sém zà lì che smontém en Val Venegia vers la macchina coi sci a dribblar turisti (el Mich l'ha anca sbaglià en dribbling!) che passeggia co le ciaspole... Saltai en macchina, l'è doverosa na tappa Bauerntoast e birra media all'imbiss de Zian, quindi saludà tutti, per le 7 e 1/4 som a cà, con zà el pensier de trar zò i ossi.... spaccà, desfà, keppottà....




Risalita la Val Venegia, se punta al canal del Travignolo (sora de noi).


...prima se traversa el ghiacciaio con zete sempre pù erte...


...po', picca alla man se salta su per el canal sempre pù ert...


...e ciliegina sulla torta... anca per le roccette!


Na volta for dal canal, se punta finalmente alla vetta!!!


Zima Vezzana! Berg Heil! ....e adess el pensier el va za alla discesa dall'altro versante..... Sarala erta?


Sì!


...e infatti no pensém do volte a smontar i primi 20 metri sci sulla schena.


E adess finalmente se pol saltar zo en val Strut.


Finchè, al salto de roccie scominziem el travers a sinistra.


Con qualche cavél bianc en pù per via della valanga, puntém dritti davanti alla forcella delle Farangole.


...e anca a saltarghe zo, nem sempre de sci ripido!


Quindi, smontai dalla forcella (l'è quella a sinistra) mi e l Luca puntém dritti en tel vallom sotto, ma l Mich el Gheda i g'ha zà davanti....


...la prossima meta.... el Mulaz!



Ste pagine l'e' stae cargade volte da visitatori dal 3 de agost 2005