GARA SCIALPINISTICA Ciampac del 17/01/2008

Cargai i sci en macchina ancor la mattina prima de nar a laorar, sento me cosina al Ciampac che la me conferma che el let per mi en rifugio i l'ha za fat su...e lori i e' za caldi per la gara sul Ciampac de stasera. No ghe penso sora do volte allor, e me iscrivo direttamente all'ufficio gare della me societa' (la Bela Ladinia)! Parti' da Trent per le 5, dopo en salt all'Amplatz a veder se gh'e' qualcoss de bel per trar via soldi, alle 7 e 1/2 som za' li' a Alba de Canazei cambia' da gara e con su el pettorale (no sel diseria che tre ore prima ero ancor n'impiegato modell en giacca e cravatta a diriger la me azienda zo per Trent!). Subit encroso i me cosini che e' za drio a scaldarse en te l'arena della partenza. A dir el vera l'e' en po' bonora, vist che la partenza i l'ha messa alle 8 e mi mezzora prima som za li' che corro su e zo vers la cieseta del paess. Spero de no aver esagera' a far carico de energie (a disnar en bis de pizza e canederli, a merenda na focaccia de olive e pomodorini. Per parar zo tutt en bon mez litro de sali minerali nol manca mai!). Ne allineem tutti (sem 150).... pronti... via! La parte bassa me tegno de bon pass a traversar el paess e no me lasso zerto passar davanti da nessuni, po' quando taca la prima e la seconda ponterota (e qualcheduni deve anca aver trova' en scortol....) me metto a zercar en ritmo giust per tegnir la salita su e su: d'altronde quasi 700 metri de dislivel no l'e' miga na roba poc en velocita'! G'ho da far le mie a passar na donna che l'e' sulla me traccia (eh... no g'ho zerto voia de nar a batter traccia en tel polverom!) e me toca tegnirmela davanti 5 minuti, po' en scatto de orgoglio e.... eh,eh! Som davanti! Adess gh'e' altri do siori.... 1, 2.... fatt en dritto! Bene, bene. Dopo na vintina de minuti (credo.... vist che l'oroloi no gh'evo zerto temp de vardarlo) sem su per le pontere coi 4 tornanti de forestale. Eh... qi forse l'alzatacc el podria tornar comot, ma anca se uno el me passa, riesso a tegnirme drio al pass. Sul pianoro en travers, pel da gara o no se vede i fondisti, e altri 2 i me da' zo l'orz. Finalmente se vede le luci della staziom a monte della funivia (che dovria esser l'arrivo): adess vem la parte pezo.... e per n'attimo me ven el dubbio se sia meio fermarse 5 secondi per trar su l'alzatacc o far tutte le do pontere finali della pista nera senza.... mah! Entant me affianca n'altro e l me diss che el dur l'e' adess.... El so, diaolopo'! ...e adess me tocca anca risponderghe... e no g'ho fia'! Avanti! Dopo la prima ESSE de pista el me distacca avanti anca elo... diaolopo'.... sento che som drio a zeder... e sulla seconda ESSE me zede en par de volte anca le pel.... ma ormai se vede le torcie dell'arrivo! ...veloce! veloce! veloce! Diaolopo', arrivo alla funivia e e' tutt smorza'! L'arrivo, st'am i l'ha sposta' direttamente al rifugio Tobia'... altri do minuti de agonia e.... ghe som! A dir el vera en bachet da sci el m'e' ben resta' encastra' entra' le re' del traguardo dalle sbrazae che devo, ma el tempo, alla fim nol me par malvagio! Bevest en bicier de the, arriva anca la Giovanna (el Silvano, ovviamente, l'e' arriva' molto prima de mi... l'e' za' polsa'!) e raccattai i buoni pasto (sto colp se pol sceglier se magnar la pastasuta al Tobia' o la pizza alla funivia... po' alla fim se se ritrovera' tutti qi al Tobia' per la premiaziom finale) ne trem a cambiarne al Rifugio Ciampac, endo che e' li' che feva l tifo per noi anca la Maria e l Patrick (mamma e fiol dei cosini). La camera, i me da' quella della Lara (sorella del Patrick, che ancoi no la gh'e').... na suite! Trao zo el zaino e bevo na birra con quei della bella Ladinia che e' vegnu' alla gara (e no som l'unico del bas Trentim!). Passa' na mezzora l'e' propri tardi e coi cosini nem de balla a magnar na pizza a strangolom alla funivia, quindi su de balla per le premiaziom, al Tobia'. E qi de birre gh'en va zo subit n'altro par. Vist che ancoi l'e' l partono de Alba, i premia i residenti del paess arivai primi... anca la Giovanna (prima assoluta residente a Alba!). Po' en realta' a far le premiaziom i fa su en casim...Beh, dai, bela gara istess... l'e' le 11:meio nar a beverghe sora! E cosi' tornai zo al rifugio Ciampac, el Silvano el spina 1,2,3 birre, e parlando del pu' e del men arriva anca altri 10 scialpinisti della Bella Ladinia (e dalle classifiche i e' propri tutti forti!) e fim le una se scominzia de birre medie e ciacere... e per mi l'e' na full immersion de ladim: mi ovviamente ghe rispondo en dialet trentim.... che tanto i me capiss istess! Ensomma, alla fin e' vegnu' for propri en bel festom! Per le una, saludem tutti e nem a trar zo i ossi. G'ho za dit che doman per le 7 zerco de levar.... alle 9 som za' d'accordo col Teo de trovarme en Pine' per en giret tranquill co le pel: d'altronde gh'e' rischio valanghe Forte grado4! Ma sa g'averalo mai en ment, che el s'e' raccomanda' che me toga drio anca el casco????





Ste pagine l'e' stae cargade volte da visitatori dal 3 de agost 2005