SCIALPINISTICA Silleskogel e HoherNapf (A) del 22/12/2007
7 e 1/2 a Calliam: e sto colp ne fem do' dì a firmar dalle me bande! Capita lì tutti con 3 zaini a testa e l Kepo? Ah! Con en par de calzoti suti el ghe n'ha assà per na stimana! ...el rest del so zainett l'è mpienù da cartine e libri de relaziom de scialpinismo! Per le 8 sem a S.Michel dal Br1 a saltar (Kepo, Luca, Mich, Paolo) sul camper del Br1, e dopo na colaziom al bar dala so dòna, ne enviem vers el confim. Al problema de endo dormir ghe penserem stasera, adess gh'è da pensar a endo trovar polver, e così su proposta del Mich, arrivai a St. Jodok, ne trem a destra en Valsertal: quinto tornante vers Padaun (e l furgom del Br1 co le gomme estive nove el tegn meio che coi antineve!) e parcheggiem.... nem a far el Silleskogel! Pel, controllo ARVA, pronti.... VIA! I me tegn davanti così se me bruso no podo dar la colpa a nessuni.... passo bel costante, guadagnem quota prima per forestale, po' per dossoni... la salita del Silleskogel l'è sui 900 metri de dislivel, podem torla dolza. Passém davanti a na siora todesca che dopo averla saludada col solito "SERVUS" la me fa i complimenti quando, entant che vago, segno e ciamo per nome tutte le zime lì entorno: eh... no la sa miga che a forza de vegnir a firmar en Austria som ormai pù austriaco de ela! Arrivem al passo con quattro belle zete, e postai zo i sci, i ultimi 30 metri i fem a pè: el Paolo con en scatto el ne brusa tutti e l'ariva su per prim: Berg Heil! Sem sol noi en vetta: magnem, bevem, e stem lì na bona mezzora, po' dovem decider sa far vist che l'è sol mezdì! Scartà l'idea de rifarla e de nar alla Scharte lì di fronte endo che se vede en gruppom de zent che sale (ma la ne par pelada dal vent), decidem che dopo narem a far na tonda en Schmirntal.... ma entant zo le pèl e.... SUPER PULVER SCHNEE!!!! Wunderbar! Passà zo i primi 50 metri con poc fondo per el vent vem for propri en sciadom fantastico! Sciando, passai for i dossi, ne tegnim en pel pù a sinistra della traccia de salita, quindi riciapada la forestale en ten blitz sem alla macchina. No cavèm neanca i scarponi, e anzi, mi metto su le pèl prima ancor de saltar sul furgom: 5 minuti de auto e sem a Schmirn a zercar altra polver: erem indecisi tra en canalom che i ha fat al gieri piem de polverom (JochGrubenKopf) o risciar l'Hoher Napf: Risciem... e fem bem! Hoher Napf! Partim en contemporanea con altri 3 de Innsbruck, ma vist che som davanti, me tiro subit el col e i brusém.... po' stà davanti el Paolo (che adess, vista la polver assicurada, l'ha tirà for dalla macchina anca i novi sci da gara che l s'ha tolt: i Trab rossi con attacchim da gara!) e dopo 300 metri de dislivell su per el bosc (taiando la forestale se ciapa quota en fretta... ma no se tira zerto el fià!) el Paolo el se ferma n'attimo: el Mich l'è restà endrio! Che lussso! Probabilmente, grazie al stop per la caviglia el sarà stracc, e enveze... ripartim e davanti el Paolo e l Mich i è sempre pù veloci: i lasso nar. Segue el Luca a poca distanza e l Br1 el me sta davanti a pass costante. Ma com'elo possibile en pass si en pressia? Altrochè stracc el Mich.... el s'era fermà a bever! Passà na coppia de local, raggiungem la malga, en bait, e quindi l'antizima: el Paolo e l Mich i è zà arrivai, noi enveze ne fermen a magnar do scacheti de cioccolata, per darghe contro al calo de zuccheri: e me son quasi pentì da averghen ofèrt 2 scacheti anca al Luca, vist che el s'è subit ripreso e per far zima l m'ha tirà el col. Ensomma dopo n'ora e vinti dalla macchina sem zà lì a far el Berg Heil. L'è le 3 e meza dopodisnar che cavem le pel e ne trem en val: diaolopo', che polver! Ancor meio de quella trovada stamattina! Passem zo i dossi dribblando i laresi per massima pendenza e fem for propri quattro serpentine spettacolari! Po', passa' la malga, ancor quattro belle spazzolae entrà el bosc e binà la forestale ne molem vers val. La ciapèm en pel pù larga e arrivem anca a veder do gruppi de 5 putele con flauti traversi e altri strumenti a fiato che gira per le case a sonar canzom de Nadal sull'uss.
Cavà i sci gh'è da pensar endo nar a buttar zo i ossi... e così dopo aver domandà a en par de gasthof en Schmirntal, ne trem al WalderGasthof de Gries, che per 27,50 Euro a testa el ne fa anca la colaziom. E po' le propri bel! Fatta la doccia ne trem al bancom a bever 1,2,3 birrette medie, e quando l'è le 8 tra na monada e l'altra ne sentem al taol per la zena. El tris de primi l'è spettacolare, ma mi da mona, enveze che ordinarghe na classica WienerSchnitzel o CordonBleu per secont voi provar 'ste tasche de patate ripiene de formai e sora zigole (qualcoss tipo Kartoffeln Taschen mit Käse gefüllt...): 'sa saralo? Na roba tipica che devo tastar per forza! E così quando me arriva per secont, n'altro primo.... magno e taso! En pratica le tasche le era ravioli.... diaolopo'! Meio beverghe drio n'altra biretta! Alle 8 e mezza, sem tutti cotti, ne disem che la gita de doman la deciderem al volo e ne trem en let.... e anca se el Br1 el ronfa come en trattor... dormo come en sass!
Pronti al VIA per la due giorni di scialpinismo in Austria! Quinto tornante vers Padaun e.... gh'è da nar!!!! |
|
|
Se continua per forestale fim for dal bosc... |
...po' per pendii che promette spazzolae da foc se punta alla forcella.... |
|
|
...e se gira a destra.... |
...quindi molai zo i sci... |
|
|
...arrivem en vetta al Silleskogel: Berg Heil! |
Nadi en Schmirntal e parheggià a Toldern, ne enfilem subit de bom pass (massa!!!) su per la forestale.... |
|
|
...quindi saltai for dal bosc se punta alla malga... |
...quindi superada, se risale el doss... |
|
|
...arrivando sull'antizima, quindi, traversandola, se risale sci ai pei la zima dell'Hoeher Napf: Berg Heil! |
...e arrivem propri sotto l'imponente Hoger Spitze col so grestom roccioso: la sciata sotto la gresta la par veramente bella, ma la gresta la me fa propri rispett.... Spero bem che no ghe vegna brutte idee ai soci per domani (e enveze...) |
|
|
Ne molem zo dall'Hoeher Napf e tegnindone a firmar sulla sinistra trovem nef vergine.... SUPER PULVER SCHNEE!!!!! |
Ste pagine l'e' stae cargade volte da visitatori dal 3 de agost 2005