SCIALPINISTICA Breithorn del 16-17/03/2007
Tra che no se pol programmar la scarpinada sul Bianco senza prima aver provà en po' de altaquota, tra che ormai tra mi e el Breithorn l'è en fatto personale, vist che en giugno passà no l'ho podest salir sol perchè ero rugolà en tre crepacci dopo esser nà sul Polluce.... gh'è da nar! Decidem così all'ultim moment de partir ancor el vendro pomeriggio e passar la not en Vallée per esser za pronti la mattina bonora e far sto 4000 en giornada dal fondoval e senza impianti. Scampo dal laoro che no l'è ancor le 2 e tirà a um el zaino me trovo col Davide al casell a Roveredo SUD per le 4. Dopo na pausa forzata per en rabbocco de oio motor alla me Polo (anca se la magna en po' de oio.... no la perde mai en colp!) la prima pausa l'è a Novara per el prim pien de metano, quindi al confin tra Piemonte e Valle d'Aosta na biretta en autogrill, dopo 3 ore e meza de auto la ghe sta propri tutta. Tra na monada e l'altra arrivem a Cervinia che l'è le 9 de sera e dopo en salt a tor do robe tipiche da portar a cà, nem a farne pelar en pizzeria (....i fa bem i turisti a vegnir en Trentim, se qui i li pela cossì! 26 euro a testa per una pizza neanca bona i me l’ha fatta anca restar sul stomec). Ale 11 nem a zercar el parcheggio dei impianti de risalita (subit sora el paess) e ne trem zo. El Davide el dorme en la Polo, mi enveze, col me sacco a pelo che teign -40, me trago fora, en terra davanti alla macchina. No dormo tant che alle 2:36 (...e se l'ora la g'ho bem impressa el motivo el gh'è!) sento en rumor adoss al me sacc a pelo: diaolopò, sa sarà? Som serà su en tel sacc e con en salt daverzo el bocchettom per respirar e saltar for coi brazi e.... sento en caign lupo che scampa spaventà sbaiando. Ho ciapà en bel spagòt mi, ma anca elo no penso che el tornerà a snasarme tant volentera, e infatti nol me tormenta altro. Alle 4 sona la sveglia. Serem su tutt, preparem pel, zaini e sci e alle 5, mappa dei impianti alla man sem lì che ne enviem per la pista numero 7 ciamada VENTINA. L'è en pistom unico che da Cervinia la porta enzima ai impianti della Testa Grigia: al Plateu Rosà. Da lì sfruttando le piste svizzere ne porterem sulle piste ai pei del Kleine Matterhorn, e quindi na volta ligai en cordata traverserem la piana glaciale e con altri 3/400 metri de dislivel se ariverà enzima. La prima ora el passo l'è propri bom: 650m de dislivel. Ariva l'alba e no se encrosa ancor nessun scialpinista che sale. La prima tappa pensevem de farla dopo 800 metri, po' envenze a quota 3000, po' enveze.... fim al rifugio delle Guide del Cervino (3550m, al Plateu Rosà). Ma arivarghe al vers co le me pel da gara e senza rampant, i ultimi 200metri de dislivel i m'ha fat dannar. Finalmente vers le 8 e 10 entrem en tel rifugio a magnar e bever. I impianti i è ancor serai: sem i primi. E mi, co na bona brioches no podo affiancarghe en bom "Fil de fer" el bombardino tipico dell'Ossola.... Ne fermen quasi n'ora e quando taca a esserghe casim dei primi pistaioli arivai co le funivie, ripartim. Arivai ai 3800 dei impianti del piccolo Cervino sem raggiunti anca dai vari gruppi che è drio a prepararse al Mezzalama (e co na zerta soddisfaziom sento che anca lori i se confronta coi tempi che i ha fat al Sellaronda...). El problema del Mezzalama l'è che gh'è massa giàz vif... e infatti a vardar il ghiacciaio l'è propri pelà. Dopo 20 minuti de pausa ripartim, ma sarà stà anca el ritmo de salita che ho tegnù, el Davide l'accusa el stracc e per n'attimo el me fa capir che forse enzima no se ghe ariva.... ma no! Gh'è da nar! Con pù calma, ma ancoi el 4000 el dovem portar a cà e così traversà la famosa piana endo che en giugno passà som cascà en tel crep, arivem sotto el pendio. Ciapà altri 50 metri de quota, vist che gh'è da far en bel traverso su giaz vif, molem zo i sci e fem zima con picca e ramponi. Berg Heil! Per tornar sulle piste no ne lighém neanca, po' el temp el se ennuvola de colp e se alza l'aria, ma ormai sem en pista....basta molarla en zo per 1800metri! Tornà alla guida, ne speta altre 4 ore e meza de macchina... ancoi la birra la bevem sì, ma all'autogrill de casa (Ala-Avio) quando ormai l'è le 8 e meza de sera.
| I do scialpinisti i ariva primi al rifugio delle Guide al Plateu Rosà. |
|
| Gli impianti di Plateu Rosà con dietro l’imponente Cervino. |
| El Davide l’è ormai al Piccolo Cervino (a sinistra) e zà davanti se vede la nosa vetta. | 
|
| El Breithorn: se vede bem el toc de traverso da far su giaz vif. |
| Dala zima, l’immancabile foto vers el Polluce-Castore-Lyskamm-Dufour-Gnifetti… | 
|
| Vai Kepo! Altro quattromila nel C.V.! |
