TRASFERTA DA DON TORTA Vigalzano del 31/08/2006

Erem nai sul discorso quindes di' fa, quando na sera, a ca' dell'Antonella la m'eva dit che la voleva nar su a Vigalzan a farghe visita al nos vecio cappelan del paess. Eh no, queste l'e' occasiom da no lasarse scappar e cosi', sentu' don Guido Avi (in arte don Torta) avem organizza' na trasferta per i zoveni del paess a so ca'. Don Torta, l'era sta' pret en paess ale Porte tra el '40 e l '45, e po' anca a Norei, quindi a Trent e po' en Val dei Mocheni (Frassilongo, Kamauz, ...) e adess i l'ha riciama' dalla pension per sostituir el parroco de Vigalzan. L'era sta en paess a far na serata l'autum passa' e tuti quanti erem restai veramente mpressionai, e cosi' no e' sta difizile organizzar en bon gruppo de 9 persone per la trasferta. Ne sem trovai ala ciesa ale 19, quindi dopo esser passai al stadio per trovarne anca co la Cristina e l Gianni, ne sem enviai vers Perzem. Tra che l'avem tolta comoda, tra che ero sol mi che saevo la strada e ho somena' le altre macchine (ma no nevo veloce!)... dovevem esser da don Torta tra le 7 e 1/2 - 8 e sem arrivai alle 8 e meza. Anca se l'era la prima volta che nevo rent per Vigalzan la casa l'ho trovada subit e... sorpresa! Gh'era za' sul'us don Guido che ne speteva da ormai n'ora! Parcheggia' la macchina, el ne accoglie co le 2 so sorele (Sabina e, la pu' vecia, Lina de 91 ani!) entant che sona le campane (i ha fat su n'impianto stereo da foc)... e che coreografia! Prima se empiza i abeti bianchi en tel pra', po' se illumina el vialet per salir sul pra', quindi la stauta de so mama, el crocifiss con soto la foto de so papa' e enzima la grotta con rento la Madonna de Fatima coi 3 pastorei. Propri bel! Nem su tuti enzima al vial illumina', ciapem la benediziom e quando l'e' ora de tornar davanti a casa a taiar le torte che evem porta' en realta' el ne envida rento en casa e dopo avernela fat visitar (l'e' tant che en museo!) el ne porta en sala da pranzo! Che lusso! Za' tutt parecia' con... tartine, affettati, e...sei boze de vim sul taol! Oltre po' alle torte. Ne fermen li' cosi' a magnar, bever e scoltar fin le 10 e meza (e anca se le putele no le beve, de boze no sen salva una!): tra le avventure che l'ha pasa' che el conta, el temp el corre propri en fretta. Pensar che per ricostruir l'oratori de S.Maria (Roveredo), bombarda' l'unica not che lu' nol ghe dormiva rento (perche' l'era vegnu' a Vigalzam a sconder en todesc), l'hat fat na lotteria per tutt el nord Italia (!!) de en trattor de legna dei Lombardi taia' zo dai nosi paesani! Ensomma de robe el g'ha da contarne propri tante, e po' tra na storia e l'altra el ghe caccia' en mez sempre na barzeletta. De scoltarlo no se se stufa propri. Fini' de magnar el ne proprone en salt en caneva per el digestivo.... come no! E anca li' trovem za' tutt parecia' coi biceroti de ciocolata mangia e bevi da empienir de grappa de ampomole, po' se continua co la grappa de arancini, po' n'altro giro de grappa ai mirtilli e l'e' quasi mezanot.... diaolopo'! Mi g'ho da guidar! Eh beh, va, per na volta che som en macchina con me fradel e do putele (la Geo e l'Antonella), se propri i ne ferma, i lo capiss bem che sem zent per bem che no va en giro a bever!




Il giardino di casa! Se nota el vialet illumina' che sale prima alla statua dela mama de don Torta ....


...e po' e sale al Cristo endo che gh'e' la foto del papa' de don Torta. Sullo sfondo, illuminada, la ciesa del Buss.


E po', dopo la visita della casa, tutti en sala da pranzo, a festeggiar!


Mi, l'Antonella, me fradel e don Torta, taiem... la torta.

Ho mess me mama sui fornei ancoi a prepararla: e devo dir che l'ha fa propri en kepolavoro!


E per finir la serata tutti en caneva a tor quattro bei digestivi!


...ma el mangia e bevi de grappa de ampomole e cioccolato l va zo' propri bem: e quando i me offre quel en pu' che vanza... no me tiro zerto endrio!


E l'e' ormai quasi mezanot, quando ne congedem con en "a prest", vist che tornerem su a trovarlo en tre stimane, en occasiom dela messa festiva che l fa (a Vigalzan, Casalin, e al Buss).



Ste pagine l'e' stae cargade volte da visitatori dal 3 de agost 2005