SCIALPINISTICA Pale delle Buse del 12/01/2006

Ale 7, col zaino za’ pront per la discesa, ero za’ en sala da pranzo en tel rifugio a far colaziom co la Giovanna e quindi en 20 minuti, apena fat di’, ho mes su i sci, saluda’ e me som envia vers la macchina per la pista nera del Ciampac. A Alba de Canazei l’era 14 sotto zero… la macchina la g’ha mess en bel pezot a scaldarse! Puntuale ale 8 e 30 me som trova’ col Matteo en Valfloriana e sem nai su per na laterale a sinistra, fin a Sicina, quindi fin en do che se podeva co la machina, a quota 1260. Monta’ le pel de foca soto i sci e...anda che nare! Avem continua’ per forestale e pasa’ el bait del Manz, gh’era el cartel che deva altri 5,5 Km alla Malga Sass (destinazione intermedia). Avem ciapa’ subit el solit bom pass scialpinistico de 10metri/minuto (de dislivel) e cosi’ en te n’ora erem za’ su a Malga Sass (600m. de dislivel): la fin della forestale. Beh, l’impressiom che feva la nef l’era propri ottima: tanta e…. tut polverom! Alla malga avem incontra’ (oltre a do ciaspolari per strada) altri 2 scialpinisti della zona che feva la zima de fianc ala nosa: el Cimon del Tres…Dopo na veloce pausa alla malga a bever en succo di frutta , ne sem cosi’ enviadi con lori oltre la malga e, costeggia’ la destra del vallom, avem taca’ de zete sempre pu’ erte en ten canalim. L’ultim toc de canal tra la pendenza tra la tanta nef l'è sta’ na bela tribolada pasarghe fora… Qi dopo n’altra chichera de succo de frutta e do pinoi avem saluda’ i altri do scialpinisti e avem ciapa’ a costeggiar a destra la gresta che dopo eser pasada su en par de dossi la na’ porta' sula zima della pala dele Buse a quota 2412. All’inizio volevem bem far el Fregasoga, la zima li’ de fianc, ma po’, vist che altro no l’era che n’altro travers en piano su nef poca e sventada, e la zima l’evem fata…. avem cava’ le pel e dopo aver magna’, bevu’ e riconosu’ i nomi dele zime entorno, ne sem enviai vers val. Ma non prima che ‘l Matteo el g’avesa da tribolar non poc a regolar i dynafit: l’altra sera dal Max el l’eva tira’ masa e ancoi no ghe entreva pu’ el scarpon en modalita’ de discesa. A parte i lamenti dele solette sui sassi che gh'era fim all’imbocco del canal de discesa (en pel pu’avanti de quel de salita), na volta arivai a dover calar dala gresta è vegnu’ el bel! e che bel! En polverom da foc e… tant! e po’, en la discesa no serviva tornar da malga Sass, ma se resteva en tel rado bosc…e cosi’ dopo le bele serpentine zo per el canal se dribbleva i mughi e se salteva i dossi sul fianc de en rio che, dopo aver traversa’ en par de forestali el n’ha porta’ sulla nosa forestale, e da li’ sem velocemente tornai ala macchina. E cosi’ dopo ‘na bona magnada en Pine’ dal Matteo (e che magnada! pensevo de trovar en piat de pasta enveze la Elvira la n’eva prepara’ polenta, sanguinaccio, rave, affettati, formai…!!!!) e eserme tira’ a um podevo presentarme regolarmente en uficio… ale 4 men vinti! …tolendo 4 ore e meza de permesso, ma n’è valest propri la pena!




La mattina ale 7 vegno zo per la pista nera Ciampac-Aba de Canazei: l'alba sul gruppo del Sella, li' di fronte, la merita propri 'na foto!


sora el Bait del Manz se segue i 5 chilometri e mez de forestale… (varde’ quanta nef che gh’è su per la sparangola del pont!)


…che sale a malga Sass: qi la nef la par propri farina 00!


se risale cosi’ el versante drio malga Sass…


e se taca de zete fin al passo: la valletta de destra, co le zete, l’è la via de salita. Per tornar de volta vegnirem zo da quella a sinistra, a far esse!


arrivai al pass se vede la zima: quela che par pu’ alta (no l’è vera: l’è sol che l’è pu’ vizina) l’è la Pala dele Buse, quela drio la Fregasoga.


Dala Pala dele Buse, vardando endrio se vede la traccia che parte dal pass endo che sem saltai su. La zima drio l’è el Cimon del Tres.


Kepo e Matteo en vetta: drio en bass se vede i paesoti che sale al Bait del Manz (Sicina, Montalbiano…) pu’ endrio Castello di Fiemme e enfont a destra (nel vallom co la foschia) dovria eser Bolzam.


Tornai dala gresta, ‘na volta enfilai en tel canalom: che sciada da foc!


Com’ela la sciada? Da foc!!



Ste pagine l'e' stae cargade volte da visitatori dal 3 de agost 2005