13 giugno 2007: Levà alle 5:50, me trovo col Matteo al distributor del Shop Center de Perzén e fat rifornimento nem, lì drio, a casa del Zampa e la Marina a far colaziom. Avrìa dovèst vegnir anca l Gep, ma l'ha tirà buca, ste ferie le farém en trei.... ma dò tende le tolém drio istess: una la doprerem come magazzino o sala giochi, se demò binem a un qualche pòpa.... Dopo en salt en fioreria per el compleam della Silvia se parte: benom! 110 fin alla birreria Trenti dopo Primolan, quindi tappa panino e aranciata. Passà en par de coe per incidente arrivém en tangenzial a Mestre vers le 10 e 1/4: el Davide el ne speta all'aeroporto de Redipuglia per pausa pranzo e per farne far en giro en elicottero. Però la A4 l'è serada per incidente e ne tocca deviar vers Treviso. Tolém per Oderzo, po' deviem per San Donà di Piave ma.... a Musile, tra un sorpasso e una colonna, Matteo (prim della fila) el vem investì, praticamente da fermo, da na macchina che taia en Stop! Diaolopo', che bruta roba! Me s'è gelà l sangue a veder na scena del genere. Per fortuna el Teo, a parte qualche sgriff nol s'è fat nient, la moto enveze l'è KO (radiator e carter tranciai). Fata zo l'amichevole co l'investitor (che almen el s'è tolt tuta la responsabilità) ne fumen tre zighereti e riorganizzem i bagagli su 2 moto. El Teo el salta su con mi sul feràz (come lù el ciama el me vecio Transalp). Dopo na tappa benzina entorno a Bibione, magnem en panim, na birra e via per el confin: purtroppo è quasi le 2.... ne tocca saltar la tappa de Redipuglia. Subit entrai en Slovenia, taca a diluviar e così ne cacciém sotto en pont a spetar en pezòt e po' ne metém su le antipioggia e ripartim. 10 Km e sem zà a Capodistria, quindi entrem en Croazia con en sol che spacca le pree. En autostrada se va via benom, anca se la Tuono del Zampa (a dirla tutta l'è n'RSV 1000 Aprilia rimodulada...) l'è sacrificada a nar ai 130.... Ne fermen così a 50 Km da Pola per na tappa en autogrill a bever 2 birette: non di più vist che qi en Croazia el limite alcolico è 00! Arrivèm a Pola alle 6 e 1/2 e en te n'atimo trovem el nos campeggio: el Stoja. Ne scegliem la piazzola enzima alla collina e mpiantem el tendom da 4. Teo el sta mal, el g'ha la fever e el se endromenza en tenda. Mi torno en paess a prelevar dal bancomat e comprar birra e patatine. Tornà al campeggio vago en pizzeria col Zampa a tor pizze da asporto per tutti e 3. Entant che nem en pizzeria arriva en pullman de putèle olandesi e nem en perlustraziom a veder endo che le se caccia a mpiantar le tende: doman de mattina, col lustro valuterèm se ne val la pena de spostar el nostro campo base vizim alle lore tende.... Tornai en tenda a magnar la pizza con 3 bone birette ven le 10 e 1/2 che ne trém zo. Sem propri strachi....


14 giugno 2007: Vers le 9 levem. El Teo, dopo la fever da caval del gieri el s'ha ripreso, anca se l'e' tutt encricca' dalle botte che gh'e' vegnu' for dal gieri. Nem a far colaziom al bar, passando dale tende dele olandesi, ma no le gh'è: ne sa tant che le è qi sol de passaggio.... quindi, vist che i bagagli en veranda no i ghe sta, decidem de montar la seconda tenda (la mia) e tacandola (cosi' la par tutt'una e no i ne fa pagar doppi) a quella granda del Zampa, la doprerem come magazzim. E infatti neanca el temp de far la spesa al Konzum del campeggio (tolendo do bozoni da 2 litri de birra: che figada! La birra en te le boze della Coca! E la costa sol n'euro e mez per do litri!) e subit gh'e' za rento el carel della spesa! Ma vist che sotto la nosa tenda gh'e' le griglie, la voia per el disnar l'e' de na bona grigliada, e cosi', almen la carne decidem de nar a comprarla en zita' e co la scusa passar a en bancomat a tirar for en po' de kune, vist che qi i Euro no i e' massa apprezai.... No arivem neanca a vegnir for dal supermercato con 3 mega-costate e 3 kit maschera e boccaglio (snorkel!!!) che i lancia l'idea GO-KART: al gieri a entrar en zita' erem passai davanti al Kartrodromo: gh'e' da nar! Dopo na biretta al bar, contrattem cosi' 70Kune (10 Euro) per dese minuti de GO-KART.... dopo el prim giro de riscaldamento se parte veramente, i primi 3 giri son assa' empedi', ma man man che ciapo confidenza el pedal del freno me desmentego endo che l'e'. Scalda' per bem le gomme, cossi' i me speta en linea de partenza e.... via! el prim giro ghe tegno botta, resto davanti e se ciava della strettoia prima della curva! Lasso frenar el Teo e l Zampa se no i vol finir su per i copertoni.... ma po' alla fim, el Teo el me ciava sulla Jikane a 1/2 del secont giro e l Zampa propri sul traguardo....e beh! smontem tutti gasai de adrenalina e rimandem la sfida a doman. Tornai en campeggio, raccattem i aghi de pim e enviem su el falo' per far brase: che grigliatona da foc! No ghe la fem a finir le costate, ma che gusti! Dopo na siesta sotto le piante, vers le 4 ne trem en moto dall'altro lato del camping en spiaggia a tirar de brazi su per i scogli, noar e ciapar el sol. Sem propri brusai: girando en moto, decidem de doprar le maschere da snorkel al posto dei caschi... e tutti i ne varda via meravigliai.... d'altronde la prima bozza e mezza de birra l'eva za' fat el so effetto.... erem za' galvanizzai! Dopo na birretta al bar endo che conosem en sior Trentim che ne consiglia de nar a veder i delfini davanti alla nossa spiaggia (i passa alle 20:30), nem de bala a torne 3 pizze da asporto e sei birrette e, scherzai dalla barista della pizzeria (che quando la sente che volem nar a veder i delfini la ne tol per giro) nem en spiaggia a magnar. I delfini no i passa e allora... ghe bevem sora. Tornai alle tende perdem na bona mezzora a montar en ponte tibetano (coi vizini de tenda che ne varda meravigliai). Po' alla fim de "sparangole" ghen fem sol una e prova' l'equilibrismo, quando se se sbilancia se va zo de schena o de testa.... l'e' botte da orbi.... passà for el pont tibetano, entant che prova a farghela anca el Teo e l Zampa, torno en pizzeria a far scorta de birre, e qi conoso finalmente le olandesi arrivae ieri. Tra queste ghe n'è una che seta a parlarme en 'taliam (l'è drio a studiarlo). Quando ghe domando se le se ferma qi en campeggio (così spostém la tenda), le me diss che purtroppo doman le riparte a visitar el Friuli, quindi vist che le era drio a magnar le lasso finir: se sol però, diaolopò, le m'avessa dit che le voleva far la festa en spiaggia me sarìa fermà al taol... enveze le n'ha fat tutt de scondom e quando dopo 2 dì la barista la n'ha contà della festa me som ciapà en bel tirom de recie dai me soci (anca perchè, quando som tornà alle tende g'ho contà delle nove conoscenze fatte senza de lori!). Bevèst n'altro mèz litro de birra a testa, sem scavezi, e el Zampa el vol nar for a festeggiar: el vol far l'addio al celibato (sabo che vem el se sposa co la Marina!).... ne fem convinzer: tolem en taxi e ne fem portar al Disco Pub Julianika, endo che stasera gh'e' la festa studentesca. Dopo aver schiva' l'approccio a 3 putele irlandesi, co la stazza de 6 armari (mi me som rifiuta' de parlar ingles: le era propri brutte!) ne trem en pista a ballar con en par de birette. Diaolopo'! No gh'e' na putela con cui se poda tacar bottom! Te le saludi e le te snobba! E cosi', dopo n'ora de tentativi a vuoto, ne rassegnem e veramente a passi, el Zampa el ne carga sul taxi per portarne al Night al porto de Pola. El par sera', e cosi', dopo aver trinca' 5 litri de birra a testa ancoi (RECORD ASSOLUTO PER KEPO!) ne trem en tenda vers le 4.


15 giugno 2007: Vers le 10 se leva, ma.... che mal de testa! Me par che la me sciopa! A nient serve trar zo el solito litro de acqua gasada.... per fortuna el Teo el ne taia zo n'anguria e en po' alla volta riusim a tirarne for dalle straze. Nem a far colaziom al bar con tre boni capuccini, brioches e su proposta del Zampa na biretta: diaolopo'! El g'ha resom: darghe contro funziona veramente! Stem tuti meio e allora nem al supermercato a torne do affettati e peperoncini piccanti e ne fem zo 3 bone ciopete. Volevem provar el sci nautico e cosi', dopo aver domanda' informaziom e quando el gestor el n'ha dit nisba vist el cielo velato e l mare mosso, decidem de nar a farne na rampegada en spiaggia a Rovigno. Carghem corda e imbraghi sulla moto e tolem l'autostrada. Arivai en zita' e parcheggia' le moto all'hotel Eden, ne sbasem sulla costa per senteroti a pe': no g'evem drio indicaziom, sol na foto del satellite per trovar le falesie, peca' che el senter che avem tolt el salteva for za' oltre le falesie e avem zerca' per na mezzora en direziom sbagliada. Capi' la cazada, ne sem fermai al bar per na pizzetta e birretta, quindi sem tornai sui nossi passi e, dopo aver costrui' n'omenet de prea su na spiaggia piena de pile de sassi, le avem trovae. El Teo da prim, mi da secont, e po' prova anca el Zampa! En fem en par de placca, po' una strapiombante (che mi neanca provo) e per finir n'altra bela placca che me fa propri divertir. L'e' quasi le 6 che cosi' tornem a bever na biretta al bar e ne enviem per la strada costiera quindi fem sosta de nof ai GO-KART. Ovvio che prima ne tolem na biretta al bar de sora, quindi, la sfida l'e' daverta.Sto colp, sia el Matteo (propri entant che el me sferreva l'attacco) che el Zampa i vem fermai en giro perche' secondo i guardiani sul pra' no se pol nar.... Beh, sto colp ho vint mi.... me ero propri lancia'.... e anca senza contar el STOP forza' dei altri doi, penso de averghe avèst la guida pù veloce. A fine giri, i guardiani che l'è boci l'è propri teste calte e prima che vegna for na rissa, ne tolém de mèz. Anca se po', tornai en campeggio, dopo na mezz'ora torno lì col Zampa a ritirar el zaino che l'eva desmetegà ai box. Da zena, stasera nem a magnar el pess al prim ristorante for dal campeggio. I n'ha dit che i lo fa propri bom. Nem for en moto... senza casco.... se ciava! Mi togo en piatt de calamari e tra tuti i tipi de pess che me fa tastar el Matteo e l Zampa, quando arriva el piatt de tagliatelle ai tartufi som zà piem e ghen lasso lì mez. O forse ero piem per le birre trate zo entant che spetevem el magnar? Fatto sta che vers le ondese tornem en campeggio veramente a passi e dopo n'altra boza de birra ne butém zo.


16 giugno 2007: Ieri pomeriggio è vegnù na tromba d'aria a Mestre e così stamattina g'avem avest la conferma che el concerto de Vasco che dovevem nar a veder all'Heineken Jamming Festival è saltato. La mattina levem alle 9, ma fasendo na pestolada en spiaggia el Matteo el slipega sulla roccia viscida tra alghe e acqua e l va zo de muss! Diaolopo', che sfiga.... e che tai che el s'ha fat! Così na volta che el Teo l'ha mimetizzà le ferite de guerra col bandana, ne trém al bar del campeggio a far colaziom. E così saltai sulle moto nem al supermercato en centro a tor hamburger e birre e en farmacia a torghe le medicaziom per el Matteo (e el Teo el ne sorprende non poc a domandar alla commessa zeroti, disinfettante e tutt in perfetto inglese!). Tirai a um enviem el foc e fem na bona grigliada de hamburger e peperoncini, quindi dopo esser nai a domandar informaziom per el sci nautico (doman de mattina i ven a torne co la barca!) tornem en spiaggia a rampegotar su per le arcae de roccia, far el bagno e tor el sol. Tornai al bar a bever na birra, vist che le birre en bottiglia en tenda l'è calde come el piss e de pagar 3 Euro extra per doprar el frigo (con quei soldi podém torne altri 4 litri!!!!), doprém el baulèt del Transalp come moia, e empienù de acqua fredda, metem en fresca le vivande... la zena la fem alla pizzeria del campeggio. A dir el vera erem nai lì per n'aperitivo, po' ordinà na pizza piccante en trei e tre birre (da mèz litro), ordinada n'altra pizza (e altre 6 birre) e n piatt de fritto misto de mar, ciapém confidenza con la barista Adriana che la ne conferma che le putèle Croate le è diffidenti nei confronti dei 'taliani: diaolopo'! Doman, narèm en volta parlando inglese! I ne offre en giro de zigherèti e ghe tolèm n'altro giro de birre, quindi nem alle tende suonando l'armonica e cantando le canzom trentine. Po' radunà en po' de aghi de pin el Zampa l'envia via en falò e el lancia l'idea de camminar sulle brase ardenti! El Zampa el passa sora alla grande, mi enveze no: sbaglio ritmo de camminada, ma canzom e così cantando Dj OTZI "If you'll be my girl...." la g'ha l'esclamaziom "UH!! AH!!!" massa longa e me ciapo na bella temprada sotto i pei. Beh, el baulét porta vivande pien de acqua fresca el fa la so bella aziom refrigerante, po' ghe ridém sora tutti e prima de trarme sul materassim en tenda me metto su en po' de doposol sotto le piante dei pei....


17 giugno 2007: Anca ieri i so 4 litri de birra i è passai zo.... ma no l'è mai assà, e così come de routine, dopo la colaziom al bar nem a torne altre 2 boze e vers le 11 e 1/2, nem al porto en tel campeggio a parlar col tipo che el m'ha prenotà el sci nautico. Sto tipo (che el parla treistin puro.... e noi che ghe parlém en Trentino strett ne fem capir benom) el noleggia anca i AcquaScooter. El vede el me Feràz (=Transalp, come el lo ciama el Matteo) e el me propone en baratto con n'acquascooter! Ma a tornar de volta a cà su per l'Adés no me vedo massa comot...meio tegnir la moto.... Comunque per 800 Kune el ne noleggia 2 acquascooter per mezz'ora e ne alternem a gareggiar for per el mar: che figada! I arriva a na velocità de 90 Km/h.... e perchè i è limitai, altrimenti i farìa i 130! Saltar onde e ciapar el ritmo de salto, come piegar en curva evitando de centrar l'onda lateralmente (sennò el se embarca) l'è massa na figada! Smontém dopo mezz'ora tutti esaltai, adess toca a mi a far sci nautico: i vem a torme co la barca e messi i sci ai pei i me spiega come partir: gambe piegate, braccia tese avanti e finchè no som col bacino sora all'acqua, quindi dovrìa bastar endrizzar le gambe e saltar su. Par na monada, ma no l'è. El prim tentativo l'onda d'acqua tiraa su dai sci davanti la me enfossa e me toca molar la presa della corda, al second me se mola en sci e.... me se cava anca el costume, al terz me se daverze en sci e ciapo na bella stironada all'inguine.... diaolopò, e quanta acqua che tro zo ogni volta! Vorìa smetter, ma....mai zeder e così continuo na bona mezzora de tentivi e qualche colp rieso bem a tirar su el cul dall'acqua, ma i sci i g'ha demo' na gomma tipo pinne che me se liga ai pei.... i perdo continuamente. Finalmente dopo mezz'ora i me diss basta.... Nem subit al bar a torne na bona birraccia e na ciopa de pam. Dopo na siesta en tenda, tolém su le birre e ne cacciém en spiaggia. Prima a far tuffi e reste de birra sotto la nossa tenda, po' traversem el camping dalla costa rampegando su per i crozi. Tornai en tenda decidém che per svodar la tenda dalle formighe (per colpa del casim che ha fat el Kepo) gh'è temp doman de mattina, e così ne fem na partia a minigolf. Eh... no l'è zerto el sport del Kepo.... e infatti se el Matteo el stravinze le 15 buche con 28 punti, el Zampa l'ariva a 23 e mi me fermo a 15.... meio beverghe sora e così tornem en pizzeria dalla Adriana a magnar na pizzotta en trei come aperitivo (ovviamente ensema a en par de birre a testa), quindi, dopo esser passai alla locanda sul porto per n'altra birra, nem for dal campeggio a pè per na a magnar el pess... La Gina (i ne l'eva consigliada) l'era serada e così ne trem en tel locale subit lì a fianc. Stasera, per no far brutta figura parlém inglese alla cameriera.... e infatti par propri na monada sentirne parlar trentin tutta la sera e po' quando arriva la cameriera de inglese stretto.... Beh, ordinem de de tutt... totani, pesàti po' en piattom de misto de tutti i tipi de pess... e magno anca n'orata (e i me ensegna anca come cavarghe le lische) gustandomela propri! Le birre no se le conta.... sem propri su de giri.... vers le 11 tornem en campeggio al bar davanti alla reception e offrendo birra a destra e sinistra scrocchém zighereti a tutti. Tornai en tenda keppottai ghe fem i suoni de tutte le bestie de sto mondo davanti alla tenda delle "manze" lì sotto (è vegnù do donne da 250Kg l'una a empiantar la tenda sotto de noi... PAURA!!!!) finchè no le daverze la cerniera.... scampem drio l'alber della nossa tenda.... do minuti de silenzio e entant che me trao en tenda col Teo, el Zampa el sona la serenata alle manze co l'armonica (ho emparà anca mi sti dì'!!! Finalmente almen la scala so farla!). Trém zo ancor en gòz de birra e decidém, vist che l'è l'ultima sera e se sta propri bem de nar a dormir en spiaggia..... bel, bel, bel!


18 giugno 2007: levai la mattina vers le 8, tornem alla nossa tenda e scominziem a tirarne a um. Entant fem anca na pausa colaziom al bar del camping. Pagà el campeggio (50 Euro a testa.... e ne sem trattai da siori!), alle 10 sem pronti per partir coi bagagli stracargai.... ma piazzai molto pù comodi dell'andata... E via, passà le frontiere, a mezdì e vinti ne fermen per na birretta e n panim en autogrill a Trieste, quindi dopo aver vist sui tabelloni autostradali che gh'è colonna a Venezia, decidém de tornar fora a Musile sul Piave e passar en officina a metterse d'accordo per el spostamento del Monster a Verona per la riparaziom. Da qi, dopo na tappa al bar, ripartim fim a Treviso. Avressém volèst far la strada feltrina.... ma alla fim sem finidi en Valsugana: beh, almen g'avem avèst la scusa per n'altra pausa alla birreria Trenti! E così Vers le 5 erem de volta a Perzèm: a casa del Zampa gh'è la Marina che la ne speta co la griglia calda: se magna! Entant che così i prepara la taola, togo su la macchina del Zampa e slongo el Teo a casa a torse su la macchina e svodar i bagagli. Dopo aver saludà e tranquillizzà i soi, vist che no i saeva ancor nient degli incidenti, tornem a Perzém a magnar brasòle e bever birra a cà del Zampa fim le 8, quindi.... gh'è da nar! A Roveredo! Ancoi festeggia el compleanno el Greg.... el fa la grigliata! Per le otto e mezza som zà lì davanti a n'altro spiedim (uno sol... sennò fago na pacca!) e na biretta. Gh'è zo tutti, propri na bella festa.... me sento sol en po' fuori luogo ancor vestì da zinghem (....e coi mei che a casa i pensa che sia ancor en Croazia!). Vers le 9 con l'Arianna accompagnem el Matteo al pronto soccorso a Roveredo a farse veder le ferite.... diaolopo' i deve darghe i ponti... ensomma n'an per un. Esattamente n'an fa, de ritorno dal Rosa, el Teo el m'eva accompagnà per serar i taii dei ramponi e ancoi tocca a mi a accompagnarlo. Ghe toca spetar en bel pezòt e così vago a tor i zighereti e (de noi no fuma nessuni!) entant che spetém ne fém na ghebàda. Anca entant che l me amico l'è sotto i ferri e mi som for con l'Arianna a ciacerar en fago for en par, po' appena el ven for dall'ospedal e el diss che i g'ha caccia' 7 ponti, arriva anca el Max e.... ultimo giro de zighereti! (Diaolopò, con ancoi smetto!). Po' entant che ne saludèm arriva anca el Greg e vers mezanòt son sull'us a Trembelem.... el figliol prodigo l'è tornà anca sto colp! Ma co l'aria che tira me sa tant che sto giro, i mei, no i me copa el vedèl grass! Soprattutto me mama....


Ste pagine l'e' stae cargade volte